Cero Hamber  ta contribui cu donacion di 5 mil Florin na Fundacion pa Nos Comunidad

Wind Creek Aruba sosteniendo Desaroyo Sostenibel #2 di Nacionnan Uni

ORANJESTAD  (AAN): Wind Creek Aruba ta orguyoso pa anuncia un donacion generoso di Awg 5,000 na Fundacion pa Nos Comunidad, danki na un evento alegre di Pintamento. E evento a wordo organisa cu un enfoke dedica pa sostene e meta di Desaroyo Sostenibel #2 di Nacionnan Uni: Cero Hamber, cu tin como obhetivo eradica hamber y asegura seguridad alimentario pa tur hende. 

Creatividad pa un bon causa

            E evento di ‘Sip & Paint’ organisa na Wilhelmina Park tabata un reunion alegre di invitadonan di Renaissance cu a mustra nan talento artistico bao guia di artistanan local Maja Lepsanovic y Suelyn Dankerlui, mientras contribuyendo na un bon causa.

            Durante e celebracion creativo aki, e participantenan no solamente a pinta obra di arte bunita, pero tambe nan a demostra nan dedicacion pa haci un impacto positivo riba e comunidad local. Door di nan contribucion generoso, nan a logra recauda un total di Awg 5,000 pa sostene Fundacion pa nos Comunidad den su mision pa brinda cuminda esencial na esnan cu ta den necesidad 

Muestra di meta di desaroyo sostenibel di Nacionnan Uni

            Adicional na e gesto cordial aki, Wind Creek Aruba tambe ta crea conciencia tocante e 17 Metanan di Desaroyo Sostenibel (SDGs) di Nacionnan Uni. E metanan global aki ta sirbi como un plan pa un mundo mas sostenibel y ekitativo pa 2030. Como parti di e compromiso di e compania cu sostenibilidad, Wind Creek Aruba a exhibi e SDGs riba e palonan di lus dilanti e hotel mientras a organisa un siman di salud & bienestar pa su empleadonan.

            E representacion visual aki ta sirbi como un recordatorio tanto pa empleadonan como pa bishitantenan di e resort tocante e papel cu e resort ta hunga den contribui na e obhetivonan globalnan aki. 

Iniciativanan pa salud & bienestar pa empleadonan

            Durante siman di salud y bienestar, Meta di SDG #3 Bon Salud y Bienestar, Wind Creek Aruba a lansa un serie di iniciativanan enfocando riba empleadonan cu tin como obhetivo pa promove bienestar y crea un ambiente di trabou saludabel. E iniciativanan aki ta inclui:

Feria di informacion di salud y bienestar

Dia di salud mental

Encuentro cu nutricionista

Sesion di conciencia tocante cancer na pecho

            E iniciativanan aki ta enfatisa e compromiso di Wind Creek Aruba pa bienestar di su miembronan di ekipo, asegurando un ambiente di trabou saludabel y di apoyo.