Prijs di electricidad y di awa no a cambia compara cu Juli 2023
ORANJESTAD (AAN): E prijs promedio pa bari di petroleo a conoce un caida di US$ 12.40 (-13.2%) di US$ 93.74 na Augustus 2022 pa US$ 81.34 na Augustus 2023. E indice di Energia a baha cu 5.9% den e ultimo aña y a causa un efecto di -1.10 ppt.
E indicenan di “Gasolin” (-8.3%) y “Diesel” (-19.0%) a registra caida, causando un efecto di -0.47 y -0.08 ppt, respectivamente. E indice di “Electricidad” (-6.8%) a registra caida, causando un efecto di -0.57 ppt, mientras cu e indice di “Awa” a registra un subida di 0.6% y causa un efecto di 0.02 ppt.
E restante 404 bienes y servicio hunto, a conoce un subida di 1.9% y tawata tin hunto un efecto di 1.58 ppt.
Prijs di electricidad y di awa no a cambia compara cu Juli 2023. Consecuentemente, e prijs promedio di electricidad pa vivienda a keda Afl. 274.57, mientras cu e prijs promedio di awa pa vivienda a keda Afl. 168.73.
Prijs di gasolin a registra un subida di Afl. 12.40 cent (4.8%) na Augustus 2023 y a causa un efecto di 0.24 ppt riba e CPI. Prijs di diesel a registra un subida di Afl. 13.10 cent (6.2%) na Augustus 2023 y a causa un efecto di 0.02 ppt riba e CPI.
Na Augustus 2023, utilidad, gasolin y diesel como grupo, tawata tin un subida di prijs di 1.5% compara cu Juli 2023 y hunto tawata tin un influencia di 0.26 ppt riba e CPI, mientras cu e restante 404 bienes y servicio hunto, a conoce un subida di prijs di 0.5% y tawata tin efecto un efecto di 0.43 ppt riba e CPI.
