Centro Kibrahacha a adkiri un bus cu mas espacio pa tuma mas pasahero

Director Janely Nicolaas

ORANJESTAD (AAN) Señora Janely Nicolaas, Director di Centro Kibrahacha 60 plus, den entrevista cu DIARIO, a mustra hopi contento cu nan ta hopi activo, y cu nan a adkiri un bus nobo cu por carga pasahero y esnan cu ta desea di participa den nan tripnan por tuma contacto cu e Centro, pa nan por aloca nan den e bus.

   El a reitera cu nan ta hopi contento, tin hopi diferente actividad nobo, y nan a cuminza traha dos diasabra pa luna, nan tin caminata, ta bay casino, y haci hopi actividad den fin di siman.

   Esnan cu ta interesa y cu no ta miembro ainda por inscribi na Centro Kibrahacha pa por participa riba Diasabra.

   E acogida ta hopi bon, y e personal ta hopi druk y hopi contento mes, el a reitera.

   Señora Nicolaas a comenta cu awo cu e bus nobo, nan mester habri mas ruta pa p’ariba di brug, pa transporta e adultonan mayor y esaki ta e motibo pa cual nan a adkiri un bus cu mas asiento.

   Nan tin un lista di spera di personanan di pariba di brug, y nan ta bay mira con pa habri mas ruta, y hinke den otro, por si acaso nan lo habri algo mas, segun directora di e Centro.

   Den nan actividadnan mas gusta tin bingo y e caminata 6’or di mainta, tur diasabra, pa wak e solo sali cu ta un di esnan mas pidi tur luna.

El a duna di conoce cu otro siman lo cuminza cu e actividad pa haci compras den supermercado, pa nan cumpra net loke nan falta, sea fruta, berdura, pan, algo mas pa e luna.

Señora Nicolaas a bisa cu e actividadnan aki ta cubri e parti di inclusion, ambiente social, cu ta hopi importante.

E falta di comunicacion y di relacion social ta haci un impacto grandi riba e adulto mayor y esey ta pone nan bay atras hopi mas lihe cu mester.

E ta hopi importante pa saca nan foi cas, hiba nan un pasadia, of haci algo cu nan.

Centro Kibrahacha ta habri di Dialuna pa Diabierna y aworaki dos Diasabra pa luna tambe.