Centro Famia Piedra Plat ta pone man na obra pa Cuida Aruba

ORANJESTAD (AAN): Cu e di tres edicion di Cuida Aruba cada biaha ta sera mas cerca, mas organisacionn comunitario ta uni nan mes na e iniciativa nacional pa motiva participacion den nos barionan.

Un di e prome organisacionnan cu a confirma su participacion ta Funacion Centro Famia Piedra Plat, cu lo tuma e iniciativa pa hiba un grupo di boluntario pa haci nos isla limpi. Durante un encuentro na Centro Famia Piedra Plat, Prome Minister Mike Eman, hunto cu Silvhyanne Vrolijk, coordinador di CEDE Aruba, Adriaan Berg, presidente di Fundacion Centro Famia Piedra Plat, y boluntario Leo Vrolijk, a haci un yamada na comunidad pa tuma parti den Cuida Aruba riba diabierna 25  y diasabra 26 di september.

Den su apelacion na comunidad, Prome Minister Eman a resalta e papel importante cu Centro Famia Piedra Plat ta hunga riba nos isla. E centro ta un luga di encuentro caminda  famia, adulto mayor y mucha ta reuni, comparti y fortalece e sentido di comunidad. Segun e Prome Minister, e decision di e fundacion pa registra como e prome grupo comunitario pa participa den Cuida Aruba ta un ehempel di con comunidad por pone hunto man na obra pa haci un diferencia.

Eman a enfatisa cu, aunke gobierno y diferente departamento manera DOW, Bureau City Inspector, Serlimar, CMO y CEDE Aruba ta preparando tur e logistica, e exito di Cuida Aruba finalmente ta depende di e participacion di pueblo. E accion di limpiesa ta importante, pero e vision di Cuida Aruba ta bai mas leu cu esey. E iniciativa ta invita comunidad pa tuma responsabilidad tambe pa yuda mantene un scol, un centro di bario, un club deportivo of brinda un man na un bisiña cu no por haci e trabounan su mes.

Coordinador di CEDE Aruba, Silvhyanne Vrolijk, a expresa su orguyo cu Fundacion Centro Famia Piedra Plat tabata e prome organisacion comunitario cu oficialmente a registra pa participa den e accion di Cuida Aruba. Segun Vrolijk, esaki ta confirma cu Cuida Aruba ta bira un movemento di comunidad, unda cada persona por contribui na su propio manera.

El a invita mas fundacion, scol, club, grupo di amigo y famia pa registra y participa. Segun dje, disciplina y responsabilidad ta cuminsa cu cada ciudadano, y cada grupo cu ta suma nan mes ta motiva otro pa haci mescos.

Na nomber di Fundashon Centro Famia Piedra Plat, presidente Adriaan Berg a haci un yamada na e habitantenan di Piedra Plat y e barionan rond di Casibari, Seroe Lopez, Tamarijn, Ayo y Paradera pa participa activamente den Cuida Aruba.

Berg a informa cu Centro Famia Piedra Plat lo pone saco pa sushi y otro material na disposicion di e boluntarionan, pa facilita e accion di limpiesa. El a corda pa un y tur corda cuida curpa y nos bario semper tabata forma parti di e tradicion di Aruba, y cu e mesun spirito di comunidad mester sigui guia nos awe.

Segun Berg, si cada participante yena solamente dos saco di sushi, e resultado conhunto lo ta un gran diferencia pa Aruba. P'esey el a anima tur hende pa sali, pone hunto man na obra y motiva otro pa haci mescos.

Habitante di Piedra Plat y boluntario Leo Vrolijk tambe a comparti su compromiso cu e iniciativa. El a expresa su speransa cu mas residente lo tuma tempo pa haci e area rond di nan cas limpi y entrega e desperdicio den e punto di recoleccion, pa asina contribui na un bario mas limpi y un comunidad mas bunita.

Na final di e encuentro, Prome Minister Eman a resalta cu e spirito di boluntariado cu ta sali for di comunidad ta loke ta duna forsa na Cuida Aruba. El a invita tur ciudadano pa no wak e accion solamente como un dia di limpiesa, sino como un oportunidad pa pone hunto man na obra, yuda otro y fortalece e sentido di comunidad cu semper a caracterisa Aruba.

Cuida Aruba lo tuma luga diasabra 26 di september, cu seis punto di recoleccion reparti den henter isla y cu participacion di un numero creciente di organisacionnan, empresa y boluntarionan cu ta comparti e meta di mantene Aruba limpi, bunita y saludabel pa tur.