Centro di Bario Dakota ta anuncia plan grandi pa renobacion y expansion

Cu apoyo di Gobierno y colaboracion cu FIFA...

ORANJESTAD (AAN): Diahuebs anochi, Prome Minister mr. Mike Eman, hunto cu Minister di Asunto di Reino y Deporte, mr. Gerlien Croes, a asisti na un presentacion inspirado y ambicioso presenta pa e directiva nobo di Centro di Bario Dakota, cu ta propone un plan pa renoba y amplia e facilidadnan di e centro di bario.

            Centro di Bario Dakota, cu mas cu 50 aña di historia, ta un simbolo di union, formacion y desaroyo pa e bario di Dakota. Hunto cu su boluntarionan dedica, e centro a sirbi como un plataforma pa deporte, arte, musica y desaroyo personal. Esaki ta un modelo cu ta cuadra perfectamente cu e direccion y maneho di Gabinete AVP-Futuro, cu ta enfoca riba union pa desaroyo y progreso.

            Durante di e anochi aki, directiva di Centro di Bario Dakota a presenta un plan ambicioso cu e renobacion y ampliacion di e facilidadnan, cu ta cuminsa cu e cancha di turf como parti di un cooperacion strategico cu FIFA, y lo sigui cu infrastructura nobo. E plan tin un necesidad financiero concreto, y Gobierno lo analisa e posibilidadnan pa duna sosten y yuda den desaroyo di e proyecto. E renobacion di Centro di Bario Dakota lo habri e porta pa oportunidad nobo pa e hobennan talentoso di Dakota y otro barionan rond Aruba.

            Prome Minister Mike Eman tin un compromiso cu Centro di Bario Dakota, y a reafirma su compromiso pa sondea tur posibilidad pa logra e renobacion di e muraya rond di e Centro di Bario, un proyecto tan espera pa e Centro y pa e comunidad.

            Segun Minister di Deporte Gerlien Croes, su ministerio ya ta den dialogo cu FIFA pa inclui mas barionan den e plan di turf, paso Aruba ta conta cu hopi talento y esaki lo yuda den nan desaroyo. E mundo deportivo ta habri porta, pero mester crea e structuranan necesario pa por yuda desaroya talento local na un nivel mas halto.

            Minister Croes a agrega cu ya no por wak deporte solamente como un hobby. Ta tempo pa utilisa deporte manera un vehiculo pa crecemento personal y profesional. E mester ta accesibel pa tur hende, sin exclusion. Centro di Barionan ta eherce un rol esencial den comunidad cu ta yuda den e formacion di hendenan - social y deportivo - y brinda sosten comunitario na nos hendenan.

            E bishita tabata un espacio pa dialogo real, unda e mandatarionan a tende preocupacion, idea y inspiracion. Gabinete AVP-Futuro ta convivi cu Centro di Bario Dakota su vision, ambicion y amor. Trahando hunto por nace proyectonan grandi pa beneficio di tur ciudadano.