Mark Figaroa, Director di APA:
ORANJESTAD (AAN) – Director di Aruba Port Authority, señor Mark Figaroa, den entrevista cu DIARIO a menciona cu awo cu Aruba ta drentando den e temporada di turismo a baha, APA ta bay probecha pa haci mantenimento den e Puerto.
Señor Figaroa a bisa cu nan ta purbando di drecha e caminda unda tur tour-operator y taxi ta pasa y nan a opta pa inverti pa drecha esaki den fase, pues e aña aki e caminda, cu e parkeerplats banda pariba, ta wordo asfalta di nobo, y otro aña ta bay pa e parkeerplats y tambe lo cuminza riba tereno di APA mes, unda cu tin basta lapimento, cu toch bo kier bay mehora esakinan.
“Y tin diferente otro mantencionnan, manera el a indica caba, e balanan cu mester wordo construi pa support e yegada di Icon Class, otro aña, e instalacion di e fenders nobo cu nos ta bay cumpra di un pilot boat nobo tambe”, Señor Figaroa a señala. El a agrega cu tur esakinan ta inversionnan basta grandi cu nan ta bay haci den fase, y tambe cautelosamente, sin perhudica nos posicion financiero di e compania”, director di APA a señala.
El a subraya cu APA tin su reglanan cu semper tabata tey y cu e usuarionan di e Puerto manera tours operators, taxi, etc., ta cumpli cu nan debidamente.
“Nos kier traha cu nos stakeholders tambe, vooral alrededor di e Puerto. Under-long rond, nos kier crea e experiencia cu cruise ship, pero tambe pa hende local, manera Welcome Plaza tambe nos kier bay dreche pa toch bo localnan tambe por bin y haci uso di dje, y tambe complementa downtown, kiermen Playa. Dus, nos kier traha cu tur stakeholders alrededor y crea toch un ‘harbor district’ unda bo ta wak e transicion di e Puerto bay den Playa bek”, Figaroa a indica.
APA kier traha conhuntamente cu gobierno y stakeholders ubica alrededor, pa wak con por mehora e area aki. “Nos vision ta bay eigenlijk on the long, pero mi ta crea toch cu e compra di DOW, Welcome Plaza, y por wak tambe Harbor Arena e area ey nos ta desaroyando, e doñonan tambe ta invirtiendo den nan producto eynan. E vision cu nos kier crea toch ta un harbor district cu ta mehora y contribui na e bienestar di nos centro di ciudad”, señor Mark Figaroa, director di APA, a splica ampliamente.
