Asina por tin reunionnan di IPKO: *Y tampoco por mina autoridad di Parlamento
ORANJESTAD (AAN) – Parlamentario Shailiny Tromp-Lee, den conferencia di prensa di fraccion di MEP, a referi na e reunion Publico cu Parlamento y Gobierno tabata tin, dia 13 di December ultimo, prome cu recess y a reacciona riba e criticanan cu tin di oposicion.
Durante e reunion publico aki, gobierno a bin informa Parlamento tocante e situacion financiero di Pais Aruba y e negociacionnan cu Hulanda, y Tromp-Lee ta enfatiza cu contrario na loke opositornan politico ta trece padilanti, cu lo ta trata di falta di cumplimento y cu e ta basa riba mal maneho.
“Mi tin cu informa cu si nan a scucha bon, durante e reunion di 13 di December, gobierno a enfatiza e punto cardinal pakico te ainda no por a cera un acuerdo. E punto cardinal ta cu gobierno di Aruba, no a bay di acuerdo cu e exigencia pa prolonga e protocol di Supervision Financiero pa tres aña, of pa un situacion caminda no ta bay tin un fecha final”, e parlamentario a subraya.
Tromp-Lee ta di acuerdo cu e pensamento di gobierno cu nan no por acepta esaki, pasobra si nan a prolonga pa tres aña of pa fecha indefini, esaki ta bay contra Aruba su Constitucion y sigur loke e ta para pe, ta cu nan ta mina e autoridad di Parlamento di Aruba, completamente.
“Esaki mi ta haya inaceptable, y mi ta kere cu na mesa di reunion nos mester yega na un punto final, cu ta garantiza cu e ‘by passing’ aki di Parlamento, no ta bay keda concretiza. Y mi tin cu bisa tambe, cu e no ta tarea di Gobierno so; na mes momento nos como Parlamento, y sigur fraccion di MEP a percura pa e punto aki ta riba agenda di IPKO. Inicialmente e reunion di IPKO mester tuma lugar den e temporada aki, e siman cu ta tras di lomba, pero a pospone mirando e lockdown cu tin na Hulanda aworaki, pero manera e reunion di IPKO tuma lugar, nos como parlamentario y sigur fraccion di MEP lo haci uso di e oportunidad durante e reunion of na momentonan informal, pa sigui enfatiza, cu nos como parlamentarionan ta exigi respet, y ta desea cu ora ta pone condicionnan riba mesa pa gobierno di Aruba, of cualkier gobierno den Reino, cu esakinan na ningun momento por ta contra Aruba su Constitucion y no por mina e autoridad di Parlamento”, Parlamentario Tromp-Lee, a remarca.
