Celebracion nacional 18 di Maart pa mustra cu nos tur ta Aruba

San Nicolas tambe ta parti di nos isla

ORANJESTAD (AAN): E decision pa celebra e actividadnan cultural di 18 di Maart e aña aki na San Nicolas, ta ricibi cu entusiasmo positivo pa diferente ciudadano den nos comunidad. Pa hopi residente di Pariba di Brug, e escogencia aki ta simbolisa union, participacion y un reconocimento di San Nicolas como parti integral di identidad nacional.

   Dia 18 di Maart, Dia di Himno y Bandera, semper ta un momento di orguyo pa henter Aruba. E celebracion e aña aki concentra na San Nicolas, ta amplia e alcance di e conmemoracion, integrando arte, cultura y comunidad den un solo espacio.

   Ciudadano a expresa: “Tur cos no por ta pabou so. San Nicolas tambe ta parti di Aruba. Duna San Nicolas e oportunidad pa celebra 18 di Maart, ta haci nos sinti plenamente parti di e isla.”

Segun diferente reaccion, e celebracion na San Nicolas no ta cambia e esencia di e fiesta nacional, pero al contrario, e ta expande e sentimiento di cultura y hospitalidad.

   “Si nos kier mira diferencia, nos mester comparti nos cultura. Trece e celebracion akinan cu actividadnan manera mural, canto y proclamacionta ta actividadnan hopi positivo. Asina nos ta combina arte cu Dia di Bandera.”

   E celebracion tambe ta forma parti di un vision mas amplio pa revitalisa di area urbano di San Nicolas, specialmente riba Bernardstraat. Pa hopi habitante, esaki ta un paso concreto den un proceso mas grandi.

“Esaki ta un comienso di algo grandi. Nos kier rebiba San Nicolas, y con mihor cu haci esaki hunto cu un celebracion nacional manera 18 di Maart.”

   Den diferente entrevista a enfatisa cu e mensahe principal ta union. “No ta pabou di brug of pariba di brug. Nos tur ta Aruba. Unda nos ta celebrando, nos ta celebrando Aruba hunto.”

   E decision pa tene e celebracion na Aruba Carnival & Entertainment Village na San Nicolas, un espacio amplio y adecua pa actividadnan cultural, mira como un paso cu ta reenforsa inclusividad y orguyo comparti.

   Pa comunidad, e celebracion di 18 di Maart e aña aki na San Nicolas, no ta solamente un evento, pero un simbolo di union nacional y un invitacion pa tur area di Aruba participa den e mesun sentimento di identidad.  “Unda nos ta, nos ta celebrando Aruba. Y esaki ta loke ta mas importante.”