Celebracion Dia di San Juan ta un fiesta folklorico na Aruba

ORANJESTAD (AAN): Deramento di Gai ta un fiesta  folklorico cu ta existi na Aruba pa mas di 100 aña caba.

Segun bieunan, deramento di gai ta un fiesta simbolico, cu ta alavez parcialmente doctrina di evangelio.  Historia cu tin den archivo tambe ta indica cu e fiesta di San Juan a origina na e parti sur di Mexico despues pasa pa Guatemala y otro paisnan Centro Americano yega te Venezuela pa despues ser treci Aruba unda el a keda un tradicion te dia di awe como Aruba ta celebre na su manera unico.

   Na Guatemala semper nan a sigui celebra fiesta di San Juan pero na otro estilo. Muy en particular e indiannan ta celebra e fiesta aki cu baile y musica folklorico. Na Venezuela nan ta celebra San Juan de Barburato pero tambe manera esun di Aruba. E fiesta di San Juan na paisnan latino tin hopi di haber cu supersticion. Antes e indiannan tabata kere den varios Dios. Nan tabata tin por ehempel Dios pa awacero, Dios di Biento, Dios di Candela, di Cosecha y di Bon Suerte. Ta mas cu bon conoci cu e indiannan tabata tin temor pa tur e “diosnan”. Ta pesey nan tabata tene nan contento cu ofrenda y fiesta.

   E indiannan di e epoca aya tabata tin nan propio calender. Nan tabata conta nan dianan o periodo ariba e posicion di luna. Nan lunanan tabata consisti di 29 dia y un aña tabata tin 13 luna. Nan calender pues tabata haci cu e dianan di fiesta semper ta cay ariba e mesun dia tur aña. E misioneronan uzando nan sabiduria den e tempo aya no a trata di cambia e pensamento pagano y supersticioso di e indiannan. E misioneronan a escoge un fiesta di iglesia cu tabata cay un poco cerca di un fiesta di agricultura. Pues aki por mira cu e no ta un fiesta di pagano pero mas bien di biblia. E misioneronan a combina e fiesta cu e indiannan pa poco poco haci nan cristian.

   Celebracion antes: Pero antes no tabata celebra esaki dia 24 di Juni, sino dia 23 cu ta cende candelanan grandi pa core cu mala suerte y tabata tene fiestanan grandi.

   Nos bieunan tabata conta cu e cunukeronan tabata warda tur e tronconan di nan cosecha anterior manera palu di mainshi, rama y otro tipo di palonan pa kimanan ariba fiesta di San Juan.  Bispo di San Juan esta dia 23 tabata cuminza cende candelanan grandi cu ta simbolisa purificacion, core cu tur mala suerte y pa por tin un mihor cosecha.  E dia mes di fiesta di San Juan tabata tin weganan manera bulamento di candela, bailamento, cantamento, contamento di storia y chasco tur esaki rond di candela.

   Fiesta di San Juan tabata algo grandi pa Aruba. Mayoria di e pueblo no tabata traha ariba fiesta di San Juan. Parti atardi ora cuminza bira un tiki scur e fiesta ta cuminza. Despues di un par di aña e tradicion a manera cay un poco y no tabata celebra esaki manera costumber. Ta di spera cu awor cu tin personanan cu ta bringa pa sigui cu nos tradicionnan esaki lo sigui asina pa asina nos futuro generacionnan tambe lo tin e sentimiento di patriotismo pa sigui cu e tradicionnan di nos grandinan. Awe na Aruba den varios bario tin e celebracion di Dera Gai y San Juan y ta di spera cu henter pueblo di Aruba asisti na e eventonan aki pa asina conhuntamente celebra e dia aki en grande.

   E baile di deramento di gai: E Deramento di Gai antes tabata wordo haci cu un gay cu ta wordo dera den un buraco den tera. Awendia dera gay bibo no ta permiti mas. E baile di Deramento di Gai ta cuminza unda e hombernan tabata baila cu lenso dilanti nan wowonan bon mara y ta purba dal e gay. Prome cu cuminza baila y busca manera di dal e gai, un persona ta bire un poco biaha, cu su wowonan mara, te ora e perde tur sentido di direccion. Despues e ta haya un palo di bati mainshi den su man, cu cual e mester mata e gay.

   Bailadornan tabata sigui e biento pa nan sa unda mas o menos nan ta para. Tambe e bailadornan ta schuif nan pia abao buscando e gay, pasobra tampoco mag di fula tera cu e palo. E costumber ta cu cada bailado por purba tres biaha pa dal e gay. Si tres biaha bo faya, anto ta bin otro bailado bin purba. Riba e dia aki e mucha muhenan ta bisti un strik geel den nan cabey. E musiconan tambe tabata bisti un band geel. E grupo musical tabata consisti di un of mas fiyo, tambor of tambu, wicharo of wiri y di un pregonero of cantante. Cachete di burico tambe tabata ser uza algun caminda na lugar di maraca. Un cantante tabata pregona y tur presente tabata canta e refran. Segun e bailado of matado di gay ta purba na dal e gay cu ta dera den tera cu solamente su cabez riba tera (awor nan ta uza un of otro obheto) e musica ta keda keto bay y cada bez cu e hera e gay ta hopi harimento y diverticion tin. Pues e pueblo presente semper tabata tin ratonan sumamente divertido. Cada biaha cu e palo toca tera un oportunidad ta bay perdi. Tres oportunidad di dal e gai ta relaciona cu e gai a canta tres biaha segun Bijbel ora San Pedro (y no San Juan) a gaña cu e no conoce Jesus y laga Jesus Cristo so den oracion. A pesar di cambio y di variacion e fiesta di San Juan tin tres elemento clave: candela, musica y baile y dera gai. Den tur periodo esakinan a keda existi.

  E significacion di color geel: Pa e fiesta di San Juan di antes tanto e damanan como mucha muhe tabata bisti na geel. Esaki pa motibo cu bieunan ta bisa cu durante luna di Juni, Kibrahacha ta floria geel y pesey e color aki a wordo scohi pa fiesta di San Juan. Hombernan tabata bisti nan bachi, pero durante e baile nan tabata kita esaki.

   Aki na Aruba e fiesta aki ta menos popular ya cu e jongnan no ta na altura di e fiestanan aki. Antes ya pa 3’or di atardi tur hende tabata prepara pa bay Deramento di Gai. E muchanan chikito tabata bisti cu un cinta geel den nan cabez, e fiesta mes ta cuminza banda di 7’or y ta sigui te den oranan di mainta.