Celebracion Dia di Himno y Bandera 2022 y mas

Agenda Cultural Luna di Maart:

ORANJESTAD(AAN):  Diamars atardi Comision Celebracion Dianan Nacional (CCDN) a tene un conferencia di prensa, pa papia riba e celebracion y actividadnan cu ta bay tuma lugar rind di Dia di Himno y Bandera.

Presidente di e comision John Flemming a splica cu e aña aki a cuminza cu un parada y siman pasa a tuma lugar e festival Un canto pa Aruba su Himno y Bandera.

Flemming tabata tin palabranan di elogio pa tur esnan cu a participa, esnan cu a composita  y esnan cu a yuda pa e evento bay hopi bon.

Tambe el a gradici Edjean & Friends pa un excelente concierto nacional.

Flemming a indica cu tabata bunita pa wak cu despues di 2 aña por a wak Plaza Betico Croes yen di hende.

“Tur tres anochi tabata tin feria cu tentnan cu cuminda crioyo, bar, boca dushi, artesania y hopi mas”, segun Flemming, kende a sigui bisa cu tabata great pa wak cu porfin pueblo di Aruba por a goza un biaha mas di e bunita anochinan di canto.

El a indica cu Minister di Cultura a anuncia, cu e aña aki nos a scoge como tema un di frasenan conmovedor di nos Himno:

Aruba, “Chikito y Simpel Bo Por Ta Pero Si Respeta”.

“Un frase cu ta identifica cu pa nos Pais no tin barera, aunke con chikito cu nos por ta, e amor pa nos Pais ta asina grandi, cu no tin nada pa kibr’e”.

 Nos ta un pueblo di hendenan caluroso, humilde y balente. Esaki a haci cu Betico den cuadro di su strategia pa concretisa e deseo di nos pueblo pa su libertad, a mira cu introduccion di Himno y Bandera, e instrumentonan clave pa logra trece union y engrandece e amor patrio den nos pueblo. Un union cu a wordo fortifica mediante e pensamento y stimacion cu tur esnan cu a nace aki y otronan cu a bin establece aki y haci e isla aki nan hogar di biba manera un bon Arubiano, segun Flemming.

El a bisa tambe cu e aña aki ta celebra e di 46 aniversario cu riba e anochi di 18 di Maart 1976, den Wilhelmina Stadion durante un acto oficial organiza pa Gobierno Insular di Aruba, den presencia di e pueblo di Aruba, a proclama oficialmente nos Himno y Bandera. Un dia historico cu ta keda graba den memoria di e pueblo, cu a keda pasa di generacion pa generacion.

Desde aña 1976, Aruba a haya oficialmente su Himno Nacional (Aruba Dushi Tera) y nos Bandera a keda registra den historia di nos Isla Aruba, cu riba 18 di Maart tur aña, Aruba ta celebra nos Dia Nacional, Dia di Himno y Bandera.

“Luna di Maart ta nos luna cultural caminda nos ta dedica na nos Dia di Himno y Bandera”. E proximo actividadnan riba e calendario di celebracion pa e aña aki ta:

• ‘Poeta di Patria’, cu ta bay ta riba Diamars 15 di Maart di 7’or pa 10’or di anochi.

Esaki segun Flemming kende a sigui bisa cu desde 2011 a inicia cu e bunita proyecto aki, unda cu e ciudadanonan di Pais Aruba por competi cu nan poema y asina gana e titulo di honor ‘Poeta di Patria’. Pa e aña aki esaki lo tuma luga den Cas di Cultura. E competencia aki lo conta e aña aki cu un total di 16 participante.