Amica Betty, ken por a kere cu e lo a bay asina tempran for di nos.
Ora bo menciona AJMG Santa Cruz ta inevitabel cu Betty su nomber ta bin den bo mente. Nos ta figure ta cana stret recht asina den su uniform berde cu blanco cu su baret riba cabez y e krulnan di su cabey ta decora su cara.
Amica Betty di jong tabata miembro di AJMG Santa Cruz. E tabata un AJMGer di curason. Ora a acerc'e pa e bira lider e la acepta y el a haci e trabou boluntario aki cu hopi pasion te na ultimo. E la forma parti di nos AJMG drumband. Tambe e aña cu nos drumband a transforma den un brassband Blue Diamond pa toca den parada grandi di carnaval e no por a keda afor.
Betty a dedica un gran parti di su bida na AJMG. E tabata e unico amica activo te na ultimo. Un amica contento y yen di energia. Betty tabata train e muchanan toca den drumband, marcha bunita, hisa bandera pa e actividad di tur aña di Himno y Bandera den Parokia di Santa Cruz. Pa hopi aña el a percura pa e parti formal aki di hisa bandera bay nechi, sin fout, riba e celebracion di 18 di maart di Conseho Pastoral di Santa Cruz. Tambe e tabata bay aubade cu e grupo di AJMG Santa Cruz.
Muchanan a haya hopi falta di e encuentronan di AJMG y di nan amica stima durante Covid y despues cu su salud no a duna mas pa e por a sigui. Betty semper corecto y disciplina a traspasa e balornan aki pa e miembronan di AJMG. Cu yen di smaak muchanan di AJMG tabata bay na su encuentronan. Den e encuentronan su talento di traha obra di man tabata resalta. Pa cada ocasion el a siña e muchanan traha obranan bunita uzando diferente tecnicanan.
Nos lo bay haya su falta sigur. Cu Amica Betty na bida, e existencia di AJMG Santa Cruz tabata sigura.
Den nomber di tur e amica- y miembronan di e famia di Arubaanse Jongens- en Meisjes Gilde nos ta gradici di curason pa tur e bunita trabou cu Amica Betty a haci pa nos organisacion di AJMG Santa Cruz. Nos ta pidi Papa Dios pa dun'e un bunita lugar den su Reino y cu Amica Betty sosega na paz.
