Celebracion di finalisacion di proyecto ‘Biba nos Herencia’

*Expo lo ta habri pa publico for di awo pa januari 2026 na MANA

ORANJESTAD (AAN): Diahuebs 11 di september, tawata un anochi hopi special na Museo Arqueologico Nacional Aruba (MANA) na unda a celebra finalisacion di un proyecto hopi bunita cu a dura dos aña largo. Un proyecto dedica na nos herencia cultural.

Na e ocasion, directora di Stichting Monumenten Fonds, señora Anne Witsenburg-de Jong a conta e historia con e proyecto ‘Biba nos Herencia’ a cuminsa. E idea a nace di un proyecto di colaboracion entre fotografo di Hulanda Monique Anröchte y Stichting Monumentenfonds Aruba.

Un proyecto iniciativo unda ta haci uzo di e plataforma social Instagram cu ta enfoca riba potretnan di nos herencia cultural. Despues di 2 aña di trabounan hopi intensivo, e proyecto a finalisa. Na juni ultimo, un ‘spoiler’ di e resultadonan a ser mustra durante e ‘Open Monumenten Dag na San Nicolas y despues tambe den e proyecto ‘Ban Bek Caya’ na Oranjestad. For di awo, Aruba henter por disfruta di dje den forma di exposicion completo como tambe den forma di un revista. E fin di siman aki, señora a duna di conoce, durante e Open Monumenten Dag na Hulanda, 16 di e potretnan lo ta exponi na Groothandelsgebouw na Rotterdam.  

Witsenburg-de Jong a duna di conoce cu e Expo di ‘Biba nos Herencia’ lo ta habri pa publico for di awo pa januari 2026 na Museo Arqueologico Nacional Aruba y despues lo bay rond di Aruba. Aruba henter por pasa wak e resultado di e bunita proyecto aki durante oranan di bishita.

Na e ocacion, Prome Minister di Aruba, Mike Eman a corta e acostumbrado sinta pa duna apertura na e presentacion di e bunita Proyecto ‘Biba nos Herencia’ y despues tambe durante e programa, a duna un discurso cortico.

Señora Witsenburg-de Jong ta gradici tur cu a haci e proyecto aki posibel y alabes ta invita pueblo di Aruba pa pasa na Museo Arqueologico Nacional Aruba pa disfruta di e Expo di ‘Biba nos Herencia’.