Benito Dirksz a hiba combersacion cu Parlamento di Aruba:
ORANJESTAD (AAN): Consehal Benito Dirksz, miembro di Eilandsraad di Bonaire, a duna di conoce cu e ta na Aruba aworaki, pa hiba un combersacion cu Parlamento di Aruba, tocante e desaroyonan cu ta tumando lugar actualmente, entre Hulanda y e Islanan BES (Bonaire, SABA y St. Eustatius).
“Tin basta cos cu ta sosodiendo, cu loke nos a palabra anto nos ta mira cu mas y mas Hulanda ta bezig ta tira tur cos for di mesa, di locual cu nos a yega na acuerdo cu ne, na 2024.
“Anto awo cu nos ta mira cu ta bin cambio di gobierno, nan a dicidi cu ta tornu e acuerdonan cu nos tin, anto nan no ta consulta cu nos y no ta duna nos participacion manera debe ser”, Dirksz a señala.
Señor Dirksz ta argumenta cu tin articulo cu ta duna nan e posibilidad ey, a base di Ley pa por negosha cu Hulanda riba cosnan cu ta trata e desaroyonan di e Islanan BES, pa haci nan hunto, pero Hulanda simplemente ta laga esey un banda y ta haci locual nan ta haya ta bon, sin consulta cu e islanan manera mester ta.
Señor Dirksz a señala cu nan no ta wak e aspecto financiero so, pero nan ta wak e aspecto general. “E aspecto general ta caminda nan ta bin cu leynan cu no ta cuadra cu loke nos a palabra. Tin cierto cosnan cu nos a bisa cu nos por haci nan den bon palabracion, pero den e caso aki nan ta haci simplemente locual nan ta haya ta bon, anto nos ta keda comosifuera nos no tin nada di bisa; esey no ta clop. Pasobra nos ta den un constelacion e leynan cu tin prescribi, ta duna nos e derecho ey di sinta na mesa cu Hulanda y nan tambe cu nos, cu respet mutuo y atende nos situacionnan cu nos tin”, Benito Dirksz a señala.
El a splica cu mirando cu tin reunionnan di IPKO na caminda, unda cu cuater pais ta participa na dje y den cual Bonaire ta no aden (e no tin bos den IPKO) sino cu Hulanda ta represent’e.
“E meta di nos bishita ta, mirando cu tin IPKO na caminda, na unda cuater pais ta participa na dje, Bonaire no ta aden, pero Hulanda ta representa nos. Kiermen, Bonaire mes no tin un bos den IPKO. Loke aworaki nos pidi ta pa e Parlamentonan di Aruba, Curacao y Sint Maarten por vocifera locual cu nos ta sinti na e momentonan aki, y cu nan por vocifera di manera cu Hulanda sa cu no nos so ta para. Kiermen, nos tin nos islanan ruman para hunto cu nos y nos tanbe cu nan”, Benito Dirksz a subraya.
