Tambe a despedi di Lourdes Croes
ORANJESTAD (AAN): E Fundacion Cultuurfonds Caribisch Gebied (CCG) a celebra cu orguyo su 70 aña, marcando otro decada di contribucion cultural y desaroyo den nos comunidad.
Un di e momentonan mas emocional tabata e despedida di Lourdes Croes, kende a dedica 30 aña di servicio voluntario na e fundacion. Su compromiso incansabel y pasion pa preservacion cultural a laga un marca inolvidabel riba e organizacion y riba e comunidad en general.
Fundacion “het Cultuurfonds Caribisch Gebied (CCG)”, antes conoci como “Prins Bernhard Cultuurfonds Caribisch Gebied”, a lansa un campaña pa anuncia nan cambio di nomber. Den e fin di siman di 6 y 7 di september a tene e reunionnan plenario di e directiva pa cay hunto cu Art Week y Art Fair, cual ta un iniciativa cu tambe a conta cu sosten financiero di e fundacion. E reunionnan tabata sigur special pasobra ta e prome biaha cu e presidente nobo, Lionel Janga a dirigi un reunion plenario riba 6 di September. Como punto special, Lourdes Croes, miembro di Aruba y vice presidente di e fundacion a presidi riba e reunion día 7 como su ultimo reunion oficial.
Riba 6 di september a tuma lugar un recepcion chikito den e hofi di hotel Astoria na San Nicolas pa celebra y refleha riba e legado di e fundacion, unda tambe a introduci e miembronan nobo di e directiva diario. E celebracion a reuni ex-miembronan di directiva di Aruba, y ex-receptornan di Premio di Cultura, un premio cu ta ser entrega cada tres aña na figura cultural destaca di e isla.
Tabatin discursonan emocional di despedida for di e presidente señor Lionel Janga y e directora di oficina, señora Melanie Sloot, kende a comparti su recuerdonan trahando cu "Des," un miembro cu semper a mustra serenidad y sabiduria den momentonan di reto cu e fundacion a pasa aden. Des ta ser recorda como un lider accesibel y calmo. Tambe e señora Cathelijne Broers, directora di “het Cultuurfonds” di Hulanda, a manda bunita palabranan di despedida pa medio di un video.
Miembronan di directiva di CCG a expresa na Des cu por lo pronto nan lo sigui den contacto pa consehonan valioso pa sigui eleva e fundacion.
E organizacion ta avansa cu un imagen nobo y un nomber actualisa, reflehando e mes dedicacion fuerte pa sirbi e tereno cultural di Aruba y otro isla den Caribe Hulandes. Nos ta traha pa bira mas accesibel cada dia pa creativonan y esnan cu ta defende naturalesa, y pa esnan cu ta busca fondonan pa nan esfuerso cultural y conservacion di naturalesa. Nos lo comunica mas intensivo cu nos campo den e dianan cu ta bini y nos ta spera pa sigui yuda nos peticionarionan mas tanto cu ta posibel cu realisacion di nan proyectonan.
