Edward Maduro, lider:
ORANJESTAD (AAN) – Edward Maduro, Lider di Sindicato di Aduana (SADA), a reuni cu Minister Presidente, y el a comenta cu, no obstante, normalmente nan ta reuni cu Minister di Finanzas como SADA so.
Pero enberdad periodicamente, e sindicatonan ta reuni cu Minister Presidente, como cabes di gobierno. El a bisa cu e aña aki durante e reunionnan di indexering, a bin constata cu no solamente SADA tin problemanan pa reuni cu gobierno, pasobra leiding ta stroba nan cu esaki.
Maduro a menciona cu Minister Presidente a priminti cu e lo regla esaki ora e keda cla cu e asunto di indexering, pero lamentablemente esaki no a tuma lugar.
SADA for di 2018 ta wordo stroba continuamente door di nan leiding, pasobra no tin algo uniforme riba mesa pa tur sindicato. “E leiding ta pretende cu ora gobierno ta yama un reunion, como hefe di gobierno, ta keda na e dienst si nan ta bay of no, siendo cu gobierno mes ta yamando e reunion.
Maduro a bisa cu mirando cu gobierno ta demisionario awo, lo no sa si e director cu ta gusta pest e sindicato y strob’e di traha, no ta nada straño si e ta busca un hende pa trece nan den un situacion disciplinario.
E ora ey SADA a bisa gobierno pa pasa e reunion pa ora gobierno sinta, pa wordo formaliza di un bez pa tur. Maduro a reitera cu nan tin e problema cu leiding desde 2018 y nan a papia di esaki cu Minister di Finanzas. Aña pasa e mandatario a skirbi un carta y mande pa e director, y despues di su insistencia nan a cambia e regeling.
“Kiermen nos ta den un situacion cu cada bez dienst no ta laga espacio pa bay un reunion, por ehemplo. Nos tin un colega cu dos siman pasa tabata tin un reunion cu DRH y el a wordo raporta, pasobra dienst a bise cu e no mag bay reunion. Esaki tabata un reunion riba asuntonan cu ta regarda e miembro y el a wordo stroba pa reuni cu Recurso Humano cu a yam’e na e reunion, y kier a report’e tambe”, el a splica. Y a agrega cu e cosnan aki mester wordo regla pasobra no por ta cu esaki ta sosode y gobierno ta keda cu man cruza.
El a bisa cu e sindicato ta haya hopi keho di miembronan, cu ta bisa cu gobierno no ta duna nan atencion pa siete aña largo.
“E aña aki nos a sinti pa indexering cu Minister Presidente, y e reunion a bay bon, berdad. Pero na 2019 caba e discusionnan di indexering a cuminza, pero nan a tranca pasobra nos tabata den diferencia di opinion cu gobierno, y gobierno no tabata duna nos respet e momento ey. E aña aki e reunion a bay diferente, un tiki mas smooth, pero ainda tin hopi punto riba mesa cu no a wordo regla pa e gobierno aki”, Edward Maduro a subraya.
