Celebracion di 55 aniversario di Sitio di Oracion na Tanki Leendert 28

ORANJESTAD (AAN):  Fundacion Venerable Jose Gregorio Hernandez a cuminsa celebra dia 26 di juni 2024 cu oracion pa nan grupo.

Dia 27 di juni tabata Grupo Rumannan den Oracion Dr. Jose Gregorio Hernandez di Dakota y dia 28 di juni, Grupo di Oracion Dr. J.G. Hernandez Bonaire a cera e di tres dia di oracion. Tur tres dia tabata tin Santa Eucaristia.

            Diasabra  dia 29 tabata e gran celebracion di e di 55 aniversario cu un santo sacrificio di misa pa 10’or di mainta. Durante e misa tabata tin bendicionamento di un cuadra di mosaic di Beato Jose Gregorio Hernandez traha y regala door di Sra. Dulcie Goedgedrag. Masha danki Dulcie. Gradicimento ta bay  na pastoor Jan cu a yuda nos. Tambe na e 3 koornan cu a toca pa nos Amor pa mi Hesus, Mensahe di Hesus y koor Santa Famia.

            Pastoor Angel (Venezolano) a bin di Corsou dia 27 pa yuda nos cu e celebracion y diabierna el a sorprende nos tur cu e azeta pa enfermonan.

            Nos por mira atras ariba un bunita celebracion y contento nos ta cu nos pueblo a asisti tur e dianan. Nos directiva ta yama danki na tur cu a coopera cu nos di un forma of otro, pa nos por a celebra e fecha bunita aki. Tambe nos ta gradici e grupo musical Tradicion Tropical, cu a sa di entretene tur hende durante e brindis, hopi bendicion pa boso tur.

            E deseo ta, di haya hobennan pa por sigui cu e bunita trabao aki, ya cu casi nos tur ta hende grandi caba. Nos ta invita tur hende pa por asisti na nos oracion o misa, tur diaranson anochi 7’or. Y nos Sitio ta habri tur dia di 7.30 am pa 7.00 pm.