ORANJESTAD (AAN) Rullienne Arends, Trahado Preventivo di FADA, a declara den entrevista cu DIARIO cu nan ta cerando un aña escolar hopi exitoso.
Rullienne a comenta cu un di e charlanan cu mas a wordo duna, ta tocante vaping, tanto na scol basico como scol secundario. E tema ta den e topnan.
“Mi ta kere cu tur e muchanan cu a haya esaki, den gran parti el a duna un ‘wake up call’. Manera mi a bisa, awo nos ta bezig ta sinta cu diferente stakeholder pa un campaña nacional, pa loke ta e parti di vaping”, Rullienne a reitera. El a subraya cu esnan cu no kier tende di vaping, e dia di e campaña nacional unda cu nan bira ta bay topa cu vaping.
“Bo ta bay wak e informacion tocante e dañonan cu, di un forma of otro, e ta causa. Esey nos ta haciendo cu unda cu nos por gara comunidad, den un solo tanda e informacion ta yega. Pasobra ta hopi lamentable cu ora bo haci pregunta ken ta uza vaping, den un klas di 20 pa 25 mucha, mas mitar ta hisa nan man. Esey ta hopi preocupante, y nos tin di bisa cu nos tin afspraak cu specialistanan di pulmon, unda nos ta bay sinta cu nan tambe pa nos haya mas informacion, di nan parti. Pues, nos ta busca tur sorto di forma pa haya informacion pa pase pa pueblo”, Rullienne Arends a señala.
