Celebracion awor cu ImSan a ricibi reconocimento internacional importante

Acreditacion di Joint Commission International

• Esaki ta standardnan internacional riguroso
• Baptist Health South Florida a yuda den esaki 

ORANJESTAD(AAN): Un momento di alegria, di felicidad, y sigur orguyo tabatin Diabierna atardi na sede di ImSan na San Nicolas.

   Instituto Medico San Nicolas, cu ta traha hunto cu Baptist Health International, a ricibi reconocimento internacional E acreditacion internacional reconoce standardnan  excepcional di calidad y cuido pa pashent.

   Baptist Health International a duna di conoce di ta orguyoso di a sostene ImSan pa logra e meta importante aki na Aruba San Nicolas Medical Institute (ImSan), cu a logra acreditacion di Hospital di Joint Commission International (JCI).

   Reconoci mundialmente como e standard di oro den calidad di cuido medico y seguridad di pashent, acreditacion JCI ta nifica e compromiso di ImSan pa brinda cuido medico excepcional, cumpli cu standardnan internacional riguroso y lucha continuamente pa excelencia. ImSan ta e prome hospital na Aruba y Caribe Hulandes, y tambe e di cuater den henter e region di Caribe, pa ricibi e reconocimento prestigioso aki.

   Pa por a haya e acreditacion, ImSan a pasa un revision in di 5 dia na Juni.

Un team di JCI a evalua e cumplimento di e standardnan di hospital den diferente area, incluyendo maneho di emergencia, ambiente di atencion, prevencion y control di infeccion, liderato, maneho di medicamento y derechonan y responsabilidadnan individual. Ademas di nan propio observacionnan y entrevistanan, e revisornan a haci controlnan, unda cu a sigui e pashentnan durante nan tabata ricibi servicio.

   Cu su team multi disciplinario di experto medico, Baptist Health International, parti di Baptist Health South Florida, a ofrece servicionan integral di conseho, evaluacion, entrenamento y sosten di preparacion na ImSan, den preparacion  pa e encuesta di JCI.

   "Nos ta extende nos felicitacion mas caluroso na Dr. Rajnherc y e team di ImSan pa nan logro remarcable di obtene acreditacion internacional di e JCI. Pa medio di nos asociacion di hopi tempo, ImSan a demostra un compromiso firme cu excelencia den cuido medico", Rogelio E. Ribas, M.D., vicepresidente corporativo di Baptist Health International a bisa.

    "E acreditacion aki ta un testimonio di e dedicacion y e trabao duro di henter E team di ImSan. Nos ta orguyoso di ta parti di e viahe di ImSan y nos ta spera di sigui cu e cooperacion den avansa e excelencia den cuido medico na Aruba y e region Di Caribe Hulandes, segun Ribas.

   Baptist Health International a tin un relacion cu ImSan pa mas cu 10 aña, dunando servicionan di consulta y orientacion durante varios proyecto di expansion.

 E ta inclui construccion y re-ubicacion di e departamento di diálisis; terminacion di tres sala di operacion; apertura di e area di cirugia medico; construccion y implementacion di e prome unidad di oncologia radioterapico di Aruba, den colaboracion cu Baptist Health Miami Cancer Institute; y diseño y construccion di e planta di energia central nobo di e instalacion. Baptist Health International tambe a facilita e renovacion di E Centro Oftalmologico y e clinica di ImSan, e departamentonan di Emergencia y Radiologia, e vestibular di e edificio y e areanan di apoyo.

"Cu sosten continuo y inspiracion di nos partnernan na Baptist Heath International, nos a embarca den nos viahe pa excelencia . Luchando pa excelencia den cuido medico ta manera yega na strea si e yega solamente na luna, ya el a haci un salto grandi dilanti", Joel Rajnherc, director di ImSan, a bisa. "Logra e acreditacion di JCI ta e testimonio definitivo di e exitoso di e viahe ey ."

E logro aki ta reforza e posicion di ImSan como un proveedor di cuido medico confiable cu ta dedica na brinda servicio di calidad halto na tur su pashentnan y ta posiciona e hospital como un institucion di cuido medico lider den e region.

   Diferente Ministro, miembro di Parlamento, y profesional di diferente gremio tabata presente na e ocasion special aki.