Mientras prijs di petroleo atrobe ta surpasa 80 Dollar pa baril
- Calor excesivo ta menasa cu mas caso di Dengue rond mundo
- Turismo di productor economico pa productor di peliger di clima
ORANJESTAD (AAN)- Durante siman cu a termina, e disponibilidad di beach pa turismo na Aruba, tabata e topico central den e mundo politico na Aruba.
Mientrastanto DIARIO tabata na careda cu compilacion di informacionnan cu ta demostra cu e topico mundial mas importante, ta con hende ta bay defende su mes contra calor, cu ta hustamente uno di e motibonan cu turismo a bira parti importante di economia na Siglo 20.
“Cantidad di beach mester bira rapidamente calidad di beach,” tabata e informacion cu DIARIO a ricibi y cu a wordo sigui pa informacionnan rond mundo, cu ta tuma un decision historico tras otro riba tereno di turismo y naturalesa.
Turismo a bira e medio importante na Siglo 20 pa pone un fin na pobresa y hamber y a bira e herment cu a wordo utilisa pa paisnan den desaroyo por a conoce progreso rapido.
Kico ta pasa cu turismo, sigur a bini dilanti durante fin di siman na Amsterdam, cu a dicidi cu cruceronan no ta mara mas den e ciudad, loke a wordo considera como un inicio pa atende cu turismo cu ta wordo yama uno di e fuentenan grandi di problema den cambio di clima.
“Menos crucero, menos turista,” tabata uno di e expresionnan cu a sigui despues di e cambio historico na Amsterdam, cu ta indicativo pa loke ta pasa na mundo, caminda a resulta cu mundo ta wordo confronta cu otro brote di Dengue como resultado di mas calor na mundo.
E importancia di clima den desaroyonan mundial, sigur a bini dilanti den e cantidad di informacionnan riba clima cu tabata drenta y tabata indica claramente e cambionan cu por spera riba tur tereno.
Hidrogeno mester bay reemplasa otro fuentenan di energia y sigur jet fuel, cu ta sumamente importante pa turismo y awor ta wordo reemplasa cu Sustainable Aviation Fuel, cu ta similar na jet fuel pero no ta deriva di petroleo.
Uno di e resultadonan dramatico lo ta, cu e prijs di aviacion lo subi, manera diferente informante a splic DIARIO cu den su proximo edicionnan lo papia di e cantidad di medidanan cu lo mester wordo tuma na Aruba tambe riba termino cortico.
Uno di e problemanan grandi cu mundo mester atende actualmente, si no mester papia di e problema comun mas grandi cu mundo conoce, ta e forma cu mundo a haci uzo di asfalt pa crea careteranan.
Awe asfalt ta bira e problema serio pa e forma cu e ta transmiti calor y ta mantene e ambiente calor.
E forma cu asfalt ta absorba calor y ta mantene e ambiente calor, ta e problema serio mescos cu e inversionnan grandi cu mester wordo haci pa soluciona problemanan.
Aunke ta reduci e riesgonan di asfalt contra clima, e pregunta grandi ta keda con ta bay atende cu e fondonan necesario pa yega na cambio y adaptacionnan necesario manera ya na varios pais a wordo introduci.
Na paisnan grandi ya otro material ta wordo uza pa reemplasa asfalt pero ta confronta tambe e prijsnan mas halto y problemanan diferente.
Un factor cu a hunga un papel importante tabata e hecho cu por recicla y sigui uza asfalt, cu manera awor ta bini dilanti ta representa problema pa salud di hende.
Asfalt ta forma parti di e pakete di azeta, cu ayera pa loke ta trata su prijs a tuma otro buelta.
Prijs di azeta pa baril atrobe a surpasa 80 Dollar na momento cu e demanda a bira mas halto atrobe cu e produccion di e producto.
Pa Aruba ta sumamente importante cu ya tin e proyecto Acciona, cu ta haya interes mundial y cu mester haci Aruba un centro di hidrogeno segun e proyecto cu Ministro Glenbert Croes a anuncia.
Importante pa Aruba den e totalidad di cambio di clima no solamente ta e forma cu por transporta turista pa Aruba pero con ta adapta turismo di Aruba na e cambio di clima, cu tin resultado directo pa transportacion di e turista pa Aruba pero tambe na e loke e pais ta ofrece y cu mester wordo adapta.
Esaki ta haci cu segun informantenan e siman aki no ta e pregunta kende ta haya beach ta importante, pero con ta bay atende cu beachnan y calidad di beachnan den e cambio di clima, cu ta den atencion central.
“Mas y mas hende ta sinti e efectonan di cambio di clima pa su salud y su bienestar directamente,” informantenan a indica.
