CEDE Aruba ta cla pa lanza nan proyecto nobo: “Aruba Volunteer”

ORANJESTAD (AAN): Durante di e “Thank You Party” di e celebracion di 10 edicion di Aruba Doet, sr Daniel Tecklenborg,

director  di CEDE Aruba, a anuncia cu tin un proyecto nobo den desaroyo cu lo wordo carga bou di CEDE Aruba cu ta titula “ARUBA VOLUNTEER”.  

Aruba Volunteer ta un plataforma pa engrandece trabao boluntario y lo inicia den zomer vakantie.

Despues di 10 aña di celebracion di Aruba Doet, a tuma nota cu e necesidad pa trabounan boluntario tin un pedido grandi, pero e caminda pa por yega na otro ta resulta dificil. Por medio di un plataforma online por crea e espacio pa tanto e boluntario como e organisacion por ricibi y scoge boluntario cu tin e interes den un organisacion specifico unda e por duna algun ora di su tempo na nos comunidad. Tin biaha mester di boluntario pa algun ora of pa un proyecto specifico y no tin idea ni ken, ni unda pa busca. E proyecto aki lo bira e plataforma ideal, structura cu por yuda boluntarionan inscribi nan mes.

Tin di remarca cu por inscribi un solo biaha y tambe por inscribi pa e trabou boluntario di bo preferencia y lo por mira si esaki tin disponibilidad di bo escohencia aki.

Si un persona ta interesa di duna nan tempo liber na un organisacion pero no sa, lo tin un team di personanan cu experiencia cu lo yuda bo “match” cu un proyecto si acaso bo mester di yudansa pa scoge uno.

Tur representantenan di NGO's, fundacion, clubnan deportivo, scolnan, scouting etc dentro di poco lo ricibi instruccion con nan por forma parti den e plataforma aki y tambe lo wordo informa e dia cu e campana cuminsa pa asina nan tambe participa activamente pa promove pero tambe pa duna informacion di ki tipo di boluntario nan tin mester