Durante un bishita
ORANJESTAD (AAN): En conexion cu celebracion di 50 aña di existencia di Cas di Cuido S.A.B.A, Minister Ursell Arends hunto cu su famia a haci bishita diadomingo 3 di April 2022, na e facilidad na San Nicolas.
Minister Ursell Arends a wordo ricibi door di e Locatie Manager, sra. Mariesol Alves, hunto cu sra. Anouscka Cornett, zorg manager, y sra. Rahaida Wever, trahador social, kendenan a duna Minister y su famia un recorido den e facilidad di S.A.B.A.
E prioridad di S.A.B.A ta pa duna un cuido optimal y sigui stimula un calidad di bida halto pa su clientenan. Tur dia tin diferente actividad pa esnan den e centro manera planta mata, hunga domino, handenarbeid y mucho mas pa asina tene e mente y curpanan activo.
Minister Arends mes a experencia esaki durante su bishita door di a yuda planta mata hunto cu sr. Buchi Wernet y sr. John Esser. Tambe a hunga domino cu sr. Casimiro, sr. Ale y sra. Josefina kende nan ta clientenan di S.A.B.A. Sigur un rato hopi ameno pa Minister Arends como tambe pa esnan cu ta hospeda na e facilidad. Cu e bishita aki Minister Arends ta haya mas un bista di e experticio, e humanidad como tambe e cuido husto cu S.A.B.A ta provee na tur su clientenan, como tambe e factornan social cu ta contribui na un miho calidad di bida pa Adultonan Mayor.
Minister Arends a keda hopi contento cu e bishita y a priminti di lo pasa pronto atrobe.
Un pabien enorme ta bay un biaha mas pa tur trahador, cliente, como tambe partnernan di S.A.B.A pa e bunita logro aki y cu nan por sigui cu e bon trabou pa asina provee nos pioneronan cu e calidad di bida y cuido cu nan merece.
{gallery}Minister Arends a haya un bista di e experticio, humanidad y cuido husto cu S.A.B.A ta brinda na su clientenan{/gallery}
