ORANJESTAD (AAN)— Fundacion Rancho a cuminza muda pa su Centro di Actividad nobo, situa na Visstraat. Clifford Rosa, director di e Fundacion a duna detayes den un entrevista cu DIARIO,
y a expresa cu esaki ta un soño cu a bira, y ta birando realidad, mirando cu nan ta den un parti chikito di un edificio grandi.
EXPO-31 DI JULI:
Clifford Rosa a expresa cu nan kier duna empuhe na e actividadnan y dia 31 di Juli awor lo tin e prome exposicion, den e centro nobo aki, cu e artistanan Alydia Wever y Ryan Oduber.
Wever lo presenta un “tentoonstelling” cu yama “Mi no tin palabra”. Clifford a splica cu “Mi no tin palabra” por wordo interpreta na diferente forma, pero e aspecto artistico ta bay wordo presenta e dia ey.
CERTIFICADO DI APRECIO:
Clifford Rosa a expresa cu Fundacion Rancho ta sigur cu Aruba lo pasa door di e pandemia aki completamente, despues cu esaki a ocasiona hopi problema, no solamente na Aruba sino na henter mundo. “Como un fundacion NGO cu no tin subsidio nos a struggle pa por a sobrevivi e periodo 2020, y na April nos a haya sa cu nos tin cu sali for di e localidad na Koningstraat-38, pero cu hopi orguyo e famia heredero a aprecia cu nos tabata eyden y a duna nos un certificado di aprecio, y nos a pone esaki riba nos website”, Clifford a indica.
El a splica cu e certificado di aprecio ta pasobra nan tabata den un cas monumental cu Fundacion Rancho a duna su balor como monumento. “Y asina aki nos kier sigui duna balor na monumentonan individual cu tin den e bario di Rancho, teniendo na cuenta cu nos kier un proteccion pa Rancho y Oranjestad, pa asina nos por traha mucho miho cu proteccion di nos herencia”, el a bisa.
AGRICULTURA URBANO:
Clifford a menciona cu nan a cuminza eynan cu Aruba Doet y ya nan ta kedando full cla cu e mudamento, pa nan por sigui cu e proyectonan.
Un di e proyectonan cu e Fundacion a cuminza ta hof’i bario, y awor nan drentando den e parti di agricultura urbano, cu nan a cuminza caba mirando cu e componentenan ta poni eynan pa inicia e proceso di papia tocante e tema aki.
Nan proyecto di Bee Farming cu nan a cuminza cune tambe a produci honey, Clifford a duna di conoce. Kiermen, e centro ta multidisciplinario, encerando arte, cultura y e comercio cu tin di haber cu turismo.
“Fundacion Rancho ta den spot banda di Museo Arkeologico unda cu nos a nace na 2009. Na 2010 nos a formaliza nos fundacion y awe, na 2021, diesun aña despues, nos ta sumamente contento cu nos por ta aki den e area di Schelstraat y e area di John G. Emanstraat, pero den e area di Visstraat ta caminda cu nos ta bay crea tur e proyectonan manera e Marche di Rancho, e walking tour, duna atencion na nos educacion, bishitanan na e fornu di kalki y e tanki di awa. Pues ta un variedad di cosnan cu ta planea pero aworaki nos tin cu pone nan den ehecucion”, Clifford Rosa a indica.
