Desiree Helder director:
*Experto di USND a set up marco legislativo pa CBS
ORANJESTAD (AAN) – CBS ta informando e diferente instancianan cu tambe ta produci estadisticanan, cu nan ta bezig cu e legislacion. Asina, Desiree Helder, Director di CBS a indica den un entrevista cu DIARIO.
E aspecto cu enberdad mester garantiza, ta cu e dato tambe ta keda confidencial, y cu ta wordo traha cu e secrecia di mas grandi cu CBS por tin.
Helder a comenta cu tin biaha tin hende ta duda di duna informacion, pasobra ta pensa cu e informacion ta sali afo y ta wordo comparti cu otronan.
El a subraya cu e marco legislativo aki mester zorg pa tin mas enfoke riba e parti di confidencialidad, di e seguridad di e data, y esnan cu tin e basenan administrativo aki tin mas confianza cu ta wordo trata na un manera debido, y cu solamente wordo uza pa estadisticanan oficial y cu no wordo uza pa ningun informacion di persona, instancia, comerciante, y cu solamente ta duna un bista di, por ehemplo, prevalencia di cancer na Aruba pero sin menciona ken tin’e.
Pesey, señora Helder a reitera, e parti di legislacion (wetgeving) ta hopi importante pa ta e base solido pa por sigui traha riba esaki.
Durante e seminario cu CBS a organiza, tabata tin como invitado principal un persona di USND di Merca, esta, di Division di Estadistica di Nacionnan Uni, cu ta e persona mas reconoci mundialmente, como esun cu tin e experticia mas grandi, con pa set up e marco legislativo, pero tambe con pa tene e informacion safe. El a wordo invita pa asisti CBS con pa set up e sistema na un miho manera, di acuerdo cu e sistemanan cu ta wordo traha internacionalmente.
El a bay di acuerdo pa yuda CBS y duna nan conseho e cuadro di wetgeving pero tambe con pa traha cu otro, y cu e datonan keda safe y confidencial.
