BOGOTA: Ministro di Trabao na Colombia, esta Gloria Inés Ramirez, a bisa cu lo bay tin cambio den e Dia Laboral oficial na Colombia entrante luna di Juli venidero.
Tur esaki ta bin debi na Ley 2101 pasa na aña 2021 unda a ordena pa reduci progresivamente e dia di trabao semanal for di 48 pa 42 ora den e añanan venidero.
“E limite di ocho ora pa dia a wordo elimina, un situacion cu a genera preocupacion den e organizacionnan internacional manera International Labour Organization (ILO), cu a pidi Gobierno pa coregi e situacion aki,” e Ministro a bisa.
El a agrega cu e reforma ta diseña pa respeta e limitenan di e labor diario maximo y cumpli cu standardnan internacional. Pesey e reforma aki ta casi full na cla cu e ultimo detayenan na Colombia. Manera a ser anuncia, e lo wordo haci den tres fase: Principio, Laboral Individual, y Laboral Colectivo.
Entrante 15 di Juli 2023 na Colombia, lo bay reduci trabao cu 1 ora, esta cu ya lo no traha 48 ora pa siman, sino 47 ora.
E reduccion lo bay ta gradual, pasobra dia 15 di Juli 2024, e dia di labor lo baha te na 46 ora semanal.
E ley 2101 tin como meta pa reduci e labor semanal di forma gradual, sin reduci salario ni afecta e derechonan adkiri y garantianan di e trahadornan na Colombia.
