Clifford Rosa di Fundacion Rancho:
ORANJESTAD (AAN) -- Clifford Rosa, presidente di Fundacion Rancho, tambe a bisa, den entrevista cu DIARIO, cu tin hopi comerciante cu ta desea di haci algo pa e ciudad, y sigur den e cuadro di celebracion di 200 aña di Oranjestad. Hopi di nan kier inverti, pero ora nan wak rond y ta mira e problematica cu tin, nan ta bira disgusta y esey ta stroba pa inversionnan wordo haci.
Awo tin mas turismo cu na 2019 loke e fundacion ta ripara pasobra e hendenan ta bin den Rancho, pero, lamentablemente, nan ta haya un bario sushi; esaki ta un area, no obstante Oranjestad ful, ta yena cu sushedad. Sinembargo, hendenan ta sigui bishita Rancho; nan tin interes. Asina Clifford Rosa a subraya.
Rosa a menciona cu e fornu a wordo poni riba e mapa internacional, como un monumento industrial proteha den Rancho, y esey ta un promocion cu e fundacion ta haciendo pa hopi tempo caba, pa asina e turistanan cuminza bishita tambe Rancho.
Pero tin e situacion di adictonan ambulante y Rosa a splica cu tabata tin un decision cu a wordo tuma algun aña pasa, y e tempo ey a wordo firma un declaracion den un “samenwerking systeem” hunto cu Monumenten Fonds y Stichting Rancho.
Clifford Rosa a menciona cu Stichting Rancho hunto cu Fondo di Monumento a traha hopi duro riba esaki, pa trece tur e fundacionnan concerni hunto, y como tal nan ta haci un trabao extra cu ta e trabao cu Gobierno mester haci. Esey ta e caminda cu nan ta yega hunto pa nan colaboracion.
El a reitera loke director di Fondo di Monumento a bisa, cu mester renova e documento ey pasobra ora bo yama nan ta parce cu nan a lubida ken abo ta. “Y asina ey bo ta haya bo di carchi pa muraya, pa un simple permiso pa haci algo. Pero nos ta compronde esey y nos ta bisa pa nos bay sinta na mesa pa atende cu e problema aki (di adictonan ambulante).
E problema aki no ta sigur di Stichting Rancho su so pero nos tin añanan caba trahando den e parti aki, y nos ta kere cu nos mester ta na mesa pa dialoga”, Clifford Rosa a remarca.
