CBS preparando pa ehecuta e Censo Economico 2023 di 14 di April proximo pa 30 di Juni

Jonathan Upegui, Hefe di Departamento di Cuentanan Nacional:

ORANJESTAD (AAN) – Oficina di Estadistica (CBS) a yama un conferencia di prensa, den cual Jonathan Upegui, Hefe di Departamento di Cuentanan Nacional, a hiba palabra, unda a anuncia e Censo Economico yama: “Economic Census 2023”, cu ta bay tuma lugar na April proximo.

Upegui a duna di conoce cu desde 14 di April te cu Juni 30, CBS lo ehecuta e censo economico. Na prome lugar, el a splica kico ta un Censo Economico.

Esaki ta un enumeracion completo di tur e entidadnan economico na Aruba. Esey ta nifica cu si un empresario tin diferente filial di su compania, tur ta wordo encuesta.

El a subraya cu e censo ta pa tur compania cu ta haci un actividad economico na Aruba. Ta bay tin enfoke special riba e sector di agricultura, y pesey Santa Rosa a wordo representa den e conferencia di prensa aki, ya cu LVV tin e experticio riba e sector aki.

E meta importante di e censo ta pa CBS tin un bista di tur e entidadnan fisico activo na Aruba y asina tambe por tin un bista di con e economia di Aruba ta structura. Esaki ta yuda CBS tambe pa actualiza su lista di negoshi, y pa e Departamento di Cuentanan Nacional mes, cu ta saca e GDP, y pa esey e tin cu keda actualiza cu e manualnan di Nacionnan Uni. Na 2025 nan ta bay saca e “NSA” cu ta e nomber di e manual nobo di National Accounts di Nacionnan Uni. Upegui a remarca cu pesey e Censo Economico ta hopi importante pa e datonan.

Tambe den e censo e ta yuda wak con e economia ta, den sentido di cual sector ta cumpra cierto producto y cual ta bende cierto producto y servicio. Ademas, ta duna CBS e posibilidad pa duna datonan y estadistica na entidadnan internacional.

Upegui a splica cu e Censo ta wordo ehecuta digitalmente via un tablet y diferente encuestador ta bay bishita e entidadnan y diferente compania; nan ta pasa eynan y kizas haci un afspraak of entrevista nan di biaha.

Nan ta pidi pa representantenan di e companianan cu ta esnan cu sa di e finanzanan di e empresa. E funcionario a haci enfasis riba e punto cu CBS ta para pa privacidad. Pues, e datonan lo wordo uza solamente pa motibo estadistico y nunca lo wordo publica individualmente pero solamente di forma agrega y e datonan tampoco lo wordo comparti cu ningun otro entidad sea publico of priva.