Dr. Joyce Pereira ta remarca:
ORANJESTAD (AAN): Dr. Joyce Pereira, di Fundacion Lanta Papiamento, durante un lectura reciente den cuadro di Dia di Idioma Materno a elabora riba e Plan Educacion Nacional (PEN), cu e metanan di desaroyo sostenibel cu UNICEF a proclama cu tur pais mester desaroya, mester traha riba nan pa yega basta leu na 2030.
Dr. Pereira a señala cu e meta ta 17 y number 4 ta esun cu ta specifico pa enseñansa. For di añanan 70 te aworaki, a splica, tabata tin masha hopi discusion, tayer, conferencia, raport, investigacion y tambe hopi diferente plan di innovacion cu hopi di nan a bay den lachi.
Por menciona e proyecto Scol Multilingual, PEN 2030 y awor a caba di sali un raport na Departamento di Enseñansa.
Joyce Pereira a indica cu den e discusionnan di e raportnan ta resalta e metanan di desaroyo sostenibel (SDG's). E meta 4 ta sigura acceso igual na enseñansa di calidad y stimula siñamento pa bida largo pa tur hende.
"Lamentablemente PEN ta keda hopi tecnico y no ta elabora profundamente riba e metanan y e maneranan pa yega na e metanan ey. Ta menciona Papiamento solamente (...) seis biaha den e documento", a bisa.
A remarca cu Departamento di Enseñansa sa y tur hende sa cu hulandes ta un obstaculo grandi den nos enseñansa y cu Papiamento mester tey. No djis un lugar pa complace hende fastioso cu ta grita eyfo. Ningun caminda PEN ta referi na e balor importante di Papiamento, a agrega.
E experto a sigui bisa cu a haci un encuesta bao di e maestronan, pero e maestronan, segun e raport, no ta menciona idioma como un problema mientras cu nan tur ta enfrenta e problema tur dia y henter dia den klas, cerca nan mes y cerca e muchanan.
Den ningun caminda ta duna Papiamento un lugar special pa logra e metanan di desaroyo sostenibel. Pereira ta spera cu pronto por sigui traha riba PEN y sigui elabor'e ya cu kisas loke tin aworaki ra un prome version cu mester sigui elabora.
El a agrega cu na pagina 50 di PEN ta menciona SAM (Scol Arubiano Multilingual) y Instituto Linguistico y tambe spelling checker na Papiamento manera cu esaki ta tur cos pa enseñansa, mientras cu ortografia ta e cos menos importante, gramatica, texto pa lesa, pa haci ehercicio. Eseynan ta importante, a bisa.
