Directora di SKOA Anuesca Baly ta splica:
ORANJESTAD (AAN) – Anuesca Baly, Directora di SKOA, a amplia tocante e seguro adicional cu tur alumno mester tin banda di AZV. “E no ta un seguro grandi pero toch e ta cubri algo, en caso cu e alumno por confronta cu algo cu mester di atencion medico paden of pafo di tereno di scol.
Danki Dios nunca algo a pasa, pero bo tin cu cumpli cu ne, como stichting responsabel, pa bo por duna e mucha un seguro adicional banda di su AZV, pero no solamente AZV sino pa muchanan cu ta bin di otro paisnan y no tin AZV. Nos ta exigi si, pa nan tin un aseguro particular, pasobra si e mucha algo pas’e na scol of pafo di dje, e seguro mester por cubri esaki.
“Nos como stichting no ta responsabel pa cubri e gastonan medico di un alumno cu, por ehemplo, no ta cay bao di AZV. Den esey nos ta hopi duidelijk pasobra tin biaha mayornan ta bisa ‘si pero e mucha na scol’. No! Nos ta exigi di e mayornan, pasobra nos no ta cera porta pa ningun alumno. Tur alumno cu ta biba na Aruba, sea cu e ta cu papelnan legal o no legal, tin derecho riba enseñanza pero banda di esaki nos ta exigi pa e tin un seguro valido pa e aña escolar en curso”, señora Anuesca Baly, directora di SKOA, a reitera.
