Atrobe investigacion criminal ta pone Gobierno Eman den noticia
*Avestruz tabata cana na 2013 ora Westerhof a tuma despedida
*Westerhof a wordo menciona den un carta cu a bay pa Plasterk?
ORANJESTAD(AAN)—Na inicio di 2013, prome cu e eleccionnan Lainda Westerhof a despedi di Parlamento di Aruba y a wordo reemplaza pa Norman Roos.
Salida di Westerhof a haya atencion pa motibo cu el a crea na Aruba e impresion cu e lo participa na e eleccion y segun informacionnan tabata tin hasta material di propaganda personal den circulacion.
Na Aruba, despues di algun remarke entorno su salida, aparentemente a reina un silencio, pero ora acumula tur informacion cu a yega di wordo publica di uno of otro forma, ta topa cu corespondencia den cual hasta Plasterk a wordo acerca pa motibo di un caso den cual Westerhof lo tabata envolvi.
Despues su nomber a bay den olvido den historia politico di Aruba, cu sigur no por lubida aña 2013 ora AVP a logra 13 asiento durante eleccion.
2013 lo a drenta historia di Aruba pa e caso penal contra e ex Ministro di AVP, Benny Sevinger, cu finalmente a wordo condena na castigo di prison den e caso criminal basa riba e forma cu tereno a wordo reparti na Aruba.
E caso Avestruz no tabata e unico caso den cual un Ministro di e Gabinete Mike Eman a wordo condena na prison. Den e caso Ibis, tabata e Ministro Paul Croes cu a wordo considera culpabel dor di Husticia na Aruba.
E ambiente politico na Aruba entre 2009 pa 2017, den cual Mike Eman tabata dirigente di Gobierno, por wordo mira como un temporada cu a duna motibo pa Husticia drenta den accion cu casonan penal.
Den e temporada aki, sinembargo, e realidad financiero di Aruba, a haci cu atencion na prome lugar tabata dirigi riba e situacion financiero cu Mike Eman a laga Aruba atras y cu a exigi medidanan financiero pisa cu Gobierno Wever-Croes a tuma pa asina hunto cu e comision pa supervision Laft, cambia e rumbo financiero fatal di Aruba, cu pa colmo mester a biba cu e realidad di e fantasia economico di Citgo cu a rementa den man di Gobierno Mike Eman.
Den e temporada turbulento cu a marca e segundo Gabinete di Mike Eman, e salida di Westerhof a parce di a perde for di atencion.
Awor un investigacion penal ta bolbe trece Westerhof den noticia y ta duna prueba di e falta di e sentido di responsabilidad cu un partido politico y su lider, sigur ta carga pa su candidatonan, cu no por subi lista riba nan mes pero solamente como candidato di un partido.
Atrobe un caso criminal ta pone e partido di Mike Eman den noticia y ta habri pa Aruba e pregunta cu a keda atras, kico realmente a pasa na 2013, e aña di e triunfo politico historico di Mike Eman, cu a termina cu casonan penal den Corte di Husticia.
E pregunta ta awor si ta berdad cu un carta a wordo manda pa e Ministro di Relacionnan den Reino, Plasterk, den cual e nomber di Westerhof ta bini dilanti.
Awe Mike Eman, dirigente di AVP, mester bini dilanti pa splica Aruba kico realmente a pasa durante su gobernacion, cu a conduci Aruba na un desastre economico (Citgo) y financiero (debe nacional y PPP) pero tambe na scandalnan relaciona cu acusacionnan serio durante su gobernacion.
E caso di Westerhof ta bolbe exigi Mike Eman pa confronta Pueblo cu motibo cu diripiente Westerhof a pone fin na su esfuersonan pa keda den Parlamento di Aruba pa awe bolbe den centro di atencion den un caso criminal.
Aruba mester cuminsa ricibi contesta di Mike Eman, cu a proclama y ta proclama su mes lider di AVP, loke ta nifica cu e ta dirigi e partido y ta responsabel pa e candidatonan cu ta riba lista di e partido.
Den esaki sigur mester tene cuenta cu e forma cu el a insisti pa su amigo intimo Benny Sevinger como preso participa na eleccion y bira parti di Parlamento di Aruba, di cual hasta despues di su condena ainda e ta forma parti.
Aruba ta en espera di contesta riba preguntanan serio, cu nunca Mike Eman como lider di partido, na forma satisfactorio a entrega na e Pueblo cu pa medio di eleccion, a encarga su persona cu maneho di Aruba!
