Segun Edward Maduro di Sindicato SADA:
ORANJESTAD (AAN): Edward Maduro, representante di Sindicato di Aduana (SADA) ta di opinion cu e empleadonan publico no ta wordo compensa pa e costo di bida cu a bira alarmante. Nan ta lamenta cu pa cu esaki gobierno no ta actua.
E ta bisa cu e ambtenaarnan ta wordo neglisha formalmente door di su dunado di trabao.
Pa loke ta indexering, a laga sa cu na October, e sindicatonan a manda un carta pa gobierno pa pidi un reunion pa papia riba diferente topico, entre nan indexering, primanan cu ta wordo paga tur aña, pero nunca a bisa cu tin cu papia riba cuanto e indexering ta, Maduro a señala.
El a agrega cu na 2019 un comision a wordo institui, pero a lamenta cu e no a sigui pasobra tabata tin pandemia y esey ta e excusa cu gobierno a uza pa hinca tur cos den cashi di olvido. Pero ta wak cu e minister no ta duna e sindicatonan oido, a expresa.
Edward Maduro a declara cu gobierno tin miedo pa sinta cu e sindicatonan. Na October a pidi un reunion cu Prome Minister pasobra kier papia y delinea algun punto prome cu yega na discusion pa loke ta trata indexering.
Pero segun Maduro, nan ta pidi gobierno un reunion y nan no ta haya. Cada bes ta bin un excuus y ta lamenta cu cada biaha cu ta pidi un reunion na gobierno "ta comosifuera cu ta China bo tin cu bay bin bek pa bo haya un reunion", a expresa.
