Caso contra Clarisca Velasquez a dura mas cu 2 aña y awor hues ta dun'e rason

Abogado Desiree Croes: 

ORANJESTAD (AAN): Abogado Desiree Croes a referi den entrevista riba e caso di e ex parlamentario Clarisca Velasquez caminda cu hues a tuma un decision dialuna mainta. Pa algo pasa di 8'or di mainta Clarisca Velasquez a wordo informa riba e decision di hues pa e por trabao bek.

            Segun Croes, durante mas di 2 aña a keda lastra Sra. Velazquez y a acus'e di tur sorto di cos y na fin a logra gana e caso unda husticia a prevalece.

            E abogado a enfatisa cu esaki ta trata di un persecusion politico ya cu ningun di e cosnan cu a wordo treci dilanti no por a keda para riba pia. Nan tabata gañamento, a expresa.

            Dialuna hues a pasa riba un pa un y e kita un pa un for di mesa. E otro casonan cu nan a perde tin di haber cu proceso pasobra pa cada decision chikito mester a bay Corte.

            Tur ora e tabata wordo stroba di drenta trabao pasobra esey tabata stroba e investigacion, Desiree Croes a indica.

            Ta mas cu dos aña cu Clarisca Velasquez a wordo manda cas. Entre otro a bisa cu falsamente e tabata meldziek, mientras cu docter a emiti un declaracion indicando cu Velasquez tabata malo e siman ey. "No tabata asina cu lo a planea algo".

            E abogado a expresa cu a tarda dos aña y 4 luna, pero na fin di dia a haya rason y esey ta e parti mas importante aworaki y cu Clarisca Velasquez por keda cana cu cara na laira.

            Sentencia di hues tambe ta bisa cu mester dun'e su salario bek completamente. Tur cos cu el a perde mester hay'e bek.