Casago Aruba ta introduciendo beca pa studiante den hospitalidad

Studiantenan por cuminza aplica mesora:

ORANJESTAD (AAN): Na e lansamento oficial di Casago Aruba, co-gerente Gerald Sarmiento a declara cu e marca ta hopi mas cu un nomber - e ta un promesa di calidad di servicio na su bishitantenan, un partnership sigur cu doñonan di propiedadnan, y oportunidadnan laboral p’e staff.

   Den mesun liña cu e filosofia aki e compania a introduci Casago Aruba Scholarship Program, den colaboracion cu UA Universidad di Aruba, facultad di Hospitalidad y Estudio pa Maneho di Turismo. Ambos entidad Casago y UA a anuncia nan intencion pa selecta un studiante cu lo resalta p’e beca aki, cual ta e compania su forma di inverti den algo cu ta hopi mas valioso cu propiedad: nos talentonan local. E compania ta kere den e futuro di Aruba, cual bo ta haya dentro di su propio hendenan.

   Pa medio di sostene esnan cu kier crece dentro di turismo, hospitalidad of tech, Casago no ta solamente creando negoshi, pero tambe un miho industria, pa na su turno nos tin un miho isla.

   Riba 3 di juli, representantenan di Casago Aruba a bishita Colegio EPI pa presenta FHTMS Scholarships den tur detaye. E presentacion tabata parti di e compania su compromiso continuo den sostene studiantenan local interesa den avansa nan educacion y carera den sector di turismo riba nos isla.

   Informacion tocante e programa aki completo di cuater aña accepta den e Facultad di Hospitalidad y Turismo na Universidad di Aruba a wordo comparti. Studiantenan rond di e isla por registra, y mester cumpli cu cierto criterio.

   Aplicacionnan mester wordo haci prome cu 15 di juli, 2025, na This email address is being protected from spambots. You need JavaScript enabled to view it..

Pa mas informacion riba criterio pa aplica, studiantenan por tuma contacto cu Universidad di Aruba directamente.