Cas Veneranda ta celebra un logro clave den su restauracion

Minister Geoffrey Wever:

ORANJESTAD (AAN) - Diabierna atardi, Minister President Mike Eman y minister Geoffrey Wever, den cercania di stakeholders, famia y trahadonan, a celebra un punto crucial den e trabounan di restauracion di Cas Veneranda: E structura a yega su punto di mas halto; e 'Spantenbier'. 

"Cas Veneranda lo sirbi como un modelo pa e manera nos por duna honor na nos pasado y tambe adapta pa futuro".

E restauracion di Cas Veneranda ta un testimonio di un vision cla cu gobierno  lo sigui implementa; crea proposito nobo pa monumentonan y revitalisa nos centro di ciudad den uno vibrante y funcional pa e generacionnan cu ta bin, segun minister Wever.

Recap di trayecto: Cas Veneranda ta un monumento cu ta carga historia, emocion y simbolismo pa nos comunidad. Desde su prome dia como minister, e restauracion di Cas Veneranda tabata un prioridad personal pa Minister Wever, kende tabata convenci cu ta posibel pa restaura un edificio iconico asina y dun'e un bida nobo. Cas Veneranda lo bira un hub pa gobierno, especialmente Departamento di Asuntonan Economicopa reunion, pa actividad cultural y pa comercio (horeca). 

"Awe nos por mira e vision birando realidad. E vision cu ta mas cu solamente construi of restaura un edificio. E vision ta pa restaura confianza den nos capital." - Minister Geoffrey Wever. 

Cu hopi esfuerso a yega na e punto cu ta celebra awe. Un trayecto largo cu a inicia na aña 2021 bou encargo di minister Wever. Diferente punto mester a ser atendi cu nan, cu finalmente na aña 2024 a logra cera un acuerdo cu Stichting Monumenten Fonds Aruba (SMFA), y asina a inicia e proceso di 'aanbesteding'. Apesar di limitacion di presupuesto y desafio tecnico, e proyecto a inicia y a haya forma rapidamente. 

Pa Prome Minister Eman, "gobernacion ta continuidad", ela menciona. Un edificio manera di Cas Veneranda ta parti di historia y creatividad di nos hendenan y ta e motibonan aki a motiva e Gobiernonan cu el a lidera den e ultimo añanan pa apoya restauracion di edificionan monumental, cataloga door di Oficina di Monumento como tal. Plaza Padu, cu ta keda den e Centro di Edificionan Historico, Museo Arkeologico, Algemene Rekenkamer, Censo, Willem III Toren y Bestuurskantoor, ta algun ehempel menciona di e vision aki.

E proyecto di Cas Veneranda ta demostra e balor di continuidad y di colaboracion publico-priva y ta sirbi como ehempel di kico tur por logra den bon cooperacion. Oranjestad mester bira un centro bibo y vibrante, cu ta atrae hende pa traha, pa pasa tempo, pa socialisa, pa disfruta. Ta un recordatorio cu si nos kere den vision, si nos traha hunto, nos lo trece bida nobo den e centro di nos ciudad.