Inspector Fingal a declara:
ORANJESTAD (AAN) – Inspector di IVA (Inspectie Volksgezondheids Aruba) señora Cheryl Rosa Fingal, tambe a elabora den entrevista cu DIARIO, tocante e kehonan riba tereno di cuido dental, cu IVA ta haya y cu a pone nan hisa e atencion na esaki.
“Pasobra nos ta haya melding di dentista, di cosnan cu nan ta wak di tecnico dental, cu ta haciendo algo cu ta tereno di un dentista, y nan ta haya keho di tecnico dental mes, cu ta bisa cu nan ta trabaonan door di dentista cu t’asina mal haci di e midinan dental cu nan mester traha protesis cu ne, cu si nan trah’e nan sa cu ta bay sali malo, pero nan no sa si ta un asistente di dentista a trah’e, pasobra e calidad ta malo.
“Pues, di tur dos banda nos tabata haya kehonan y p’esey nos tambe a pone OK ban pone un structura. Y pa mi ta hopi na cla, no ta un beleid cu nos a tuma over di Hulanda, ta e reglamento cu ta aplica na Hulanda, nos no ta cambia nada na nan, pasobra como Inspectie nos mag pone nos toezicht kader y nos no ta un instancia cu ta traha beleid. Dus, nos ta tuma over di Hulanda nan recht leynan y esey nos ta inspecciona e sector dental di Aruba cu nan.
“Enberdad mi tambe ta reconoce e melding aki pero nan ta bay di ambos banda: ta bisa e mal calidad di e dentista, e mal calidad di e tecnico dental, y atrobe, bo mester tin algo pa cuminza compara nan, pa nan tur sa ‘tende, esaki ta bo tereno, esaki ta su tereno, y kico bo si mag of e no mag, te unda bo mag”.
“Y ta hopi importante tambe, nos ta papiando te unda mi ta autoriza pa haci algo, kiermen cu mi ta bekwaam. Cu mi tin e capacidad, cu mi a entrena suficiente. Pues, por wel di ta cu mi ta un dentista, cu mi bon diplomanan, etc., pero cu casi nunca mi a ranca un tipo di muela, por ehemplo. E ora ey ley tambe ta bisa ‘si mi n ta bekwaam mi ta bevoedt’. Si mi no a training nunca y nunca mi ta hacie, esey ta pone caba cu aunke mi tin autorizacion, aunke e ta nechi sikirbi den e register di AruBig, mi no mag di hacie tampoco”, Inspector Fingal a bisa.
El a señala cu esaki ta e reglanan cu ta bin den fundamento, di e cuido dental cu, como Inspectie, IVA ta bay trahando riba nan.
El a subraya cu IVA ta pone enfoke riba cuido di pashent, cual ta nos poblacion, pesey nan ta trahando un reglamento riba cuido dental pa Aruba.
