Carousel Social 2025 a enfoca specificamente bao e materia “Einleiding pa Social Work”

Jonathan Trinidad a duna di conoce:

*Dirigi na crea un fundeshi pa studiantenan di prome aña

ORANJESTAD (AAN) – E Carousel Social 2025, a tuma lugar na Colegio Educacion Profesional Basico (EPI), organiza pa e Departamento di “Social Work & Development di Universidad di Aruba”. Jonathan Trinidad, Lecturer Program Manager Social Work & Development program) ta splica, den entrevista cu DIARIO, tocante e evento aki.

“Den e caso aki, ta specificamente, bao e materia cu ta wordo yama ‘Einleiding pa Social Work’ pa crea y duna studiantenan di prome aña, un fundeshi di kico tur Trabao Social ta contene y kico tur ta e organizacionnan y diferente departamento cu ta forma un parti grandi di e sector social, como tambe di Salubridad y Educacion. Y hopi importante pa nos ta tambe, provee e studiantenan no solamente di ser conoci cu e lugarnan y organizacionnan pero tambe pa wak e oportunidad pa stage y hasta posibilidadnan na unda nan por traha den futuro, pasobra, esey tambe e ta tocante di dje”  Jonathan Trinidad a relata.

El a splica cu den e carousel e studiantenan por wak specificamente diferente kader cu nan tin, por ehemplo, e area preventivo, e area cu ta traha via ley, y tur e otro areanan cu ta forma parti di e sector social.

“No solamente ta importante e prome aña, pero e di dos y e di tres, cu tambe por a bin y conoce diferente organizacion. Esaki ta e di dos aña cu nos ta colabora cu Colegio EPI, y Salubridad y Servicio, cu a organiza esaki pa duna tambe espacio pa nan studiantenan, p’asina aki, en todo caso, nan tambe ser conoci cu diferente organizacion cu tambe nan por core stage y posiblemente traha den futuro”, Trinidad a señala.

El a menciona cu UA tin un klas di 28 studiante loke enberdad ta mustra cu tin un interes grandi, cu a hisa durante e ultimo añanan vooral. “Y mi ta kere esey ta pasobra diferente problematica social cu ta bira mas bisto tambe den comunidad, y nan a cuminza papia un tiki mas di dje, y ainda tin tabu riba cierto problemanan social, pero toch tin mas hende ta papia tocante diferente problema. Mi ta kere esey a lanta interes, y principalmente cu no ta e trabao social di antes, cu un hende tin cu sinta den un oficina pero e ta algo mas moderno y innovativo tambe y ta mas accesibel tambe y esey ta haci cu nos programa ta mas dirigi den esey”, Jonathan Trinidad a relata.