Prome Minister Evelyn Wever-Croes:
ORANJESTAD (AAN) – Minister Presidente Evelyn Wever-Croes, a yama un conferencia di prensa special cu a tuma lugar Diahuebs, na FUTURA, y den cual a toca e tema di Innovacion.
Premier Wever-Croes a bisa cu desde cu su gabinete a drenta den gobierno na aña 2017, a pone Innovacion “front and central” den su maneho.
“Innovacion no ta solamente automatizacion. Innovacion kiermen haci cosnan na un otro forma busca solucionnan pa e retonan na un forma nobo, talvez mas senciyo of talvez mas complica, pero na un forma nobo” e dignatario a reitera.
Prome minister a subraya cu gobierno a pone hopi atencion na innovacion y a organiza varios proyecto atravez di FUTURA cu ta e Fundacion cu ta encarga cu esakinan.
E dignatario a acentua cu e motibo pa cual gobierno ta pone tanto atencion na innovacion, ta principalmente pa nos muchanan, pasobra gran mayoria di nan cu awe ta bay scol basico, mañan lo haci trabaonan cu awe no ta existi ainda, y for di awo mester prepara nan miho posible pa nan por eherce e trabaonan ey na e miho manera posible, y eynan ta e caminda unda innovacion ta hunga un rol hopi importante.
“Semper e idea tabata pa nos stimula pensamento innovativo, innovado, y pa por haci esaki nos kier duna nan mas hopi tools, hermentnan, posible, pa nan por logra esaki. Tools, naturalmente, digital y cu tecnologia nobo”, Minister Presidente a señala.
Y den pasado, den e ultimo cuater añanan plus, hopi proyecto cu gobierno a haci atravez, y conhuntamente cu FUTURA, a enfoca con por ekipa e studiante, pero tambe e maestro y mayornan, miho posible pa nan por yuda nos hobennan cu tools, ideanan digital necesario pa nan por ta mas creativo y innovado den klas.
“Y nos a haci diferente iniciativa di innovacion den enseñanza, e momentonan ey, na diferente scol. E proyectonan mas cerca di mi curazon ta proyectonan cu nos a haci Cacique Aterima, cu ta e prome kleuterschool cu nos a yuda cu e proyectonan aki digital. Cacique Macuarima tambe, ademas di Colegio Pastor Kranwinkel y San Franciscus College, cu nos a yuda cu proyectonan inmensamente bunita, cu nos ta mira cu no solamente e alumnonan ta aprecia pero tambe e maestronan, y cada aprecio di nan ta duna nos mas forza pa nos sigui”, Prome Minister a expresa.
