ORANJESTAD (AAN): Finalmente a yega na turno pa Respaldo ricibi Minister di Salubridad Publico, Asuntonan Social,
Cuido di Adulto Mayor y Maneho di Adiccion, señora drs. Melvin Wyatt-Ras.
Durante e bishita, Minister Wyatt-Ras a wordo ricibi door di señora mr. Caroline Hart, directora y miembro di Hunta di Directiva (Raad van Bestuur) di Respaldo, hunto cu miembronan di e team di maneho como tambe miembronan di e hunta di supervision.
Minister a ricibi un recorido den e clinica pasando door di diferente departamento y observando servicionan manera: Dagbesteding, Opname, Resocialisatie, Policlinica pa adulto, FACT-team, Crisisdienst y Team Langdurige Zorg (TLZ).
Adicionalmente, Minister a haya un presentacion di e organisacion door di e directora di Respaldo. Den e presentacion aki Minister a haya un bista amplio di e structura, servicionan y plan di desaroyo di Respaldo. E presentacion tabata inclui informacion tocante e proyectonan cu Respaldo ta realisando, e retonan como tambe e direccion pa futuro cu Respaldo kier tuma pa sigui contribui na un miho bienestar mental pa e comunidad di Aruba.
Minister tambe a ricibi oficialmente e informe anual (jaarverslag) di Respaldo di 2024, cu ta refleha logronan, desafionan y desaroyonan di Respaldo den e ultimo aña fiscal.
Den resumen Respaldo a logra entre 2017 y 2025:
- Integra varios servicio di salud mental: FACT, ECT, POPP-poli y E-Health.
- Digitalisa e sistema di historial clinico.
- Aumenta e cantidad di profesionalnan cu mas cu 50%.
- Fortalece colaboracion cu partnernan clave.
- Inverti continuamente den desaroyo di su personal.
Den bista pa futuro, e meta ta pa ofrece cuido specialisa, basa riba recuperacion y accesibel pa tur hende. Respaldo kier sigui traha cu partnernan, haci uzo di innovacion digital y amplia cuido pa mucha, adulto mayor y forensico.
Respaldo tambe tin un departamento pa mucha y hoben situa na e localidad di Mahuma. Drs. Misha Raymond, GZ-psycholoog na Respaldo a pone Minister Wyatt-Ras na haltura di e diferente servicionan y tipo di cuido cu ta wordo ofreci akinan.
Respaldo kier gradici Minister pa e bishita aki. E muestra di interes genuino di Minister den nos trabou y den e importancia di salud mental den e plan nacional ta duna nos motivacion pa sigui traha y sigui sirbi e pueblo Arubano cu un nivel di cuido halto .
Respaldo rumbo pa un organisacion di salud mental specialisa profesional y sostenibel pa un Aruba mentalmente sano.
