ORANJESTAD (AAN)-- E welga cu e trahadornan di Arubus y Sindicato SEPPA a programa Diahuebs 1 di October awo,
a wordo cancela despues di un acuerdo logra entre e Sindicato y Minister di Husticia y Transporte, durante un reunion cu ta tuma lugar te den oranan di anochi.
Manera ta conoci, e siman aki a cuminza cu un paro laboral di dos ora, Dialuna door di e trahadornan di Arubus, debi na cu no tabata tin un avance den nan Contrato Colectivo ya pa tempo largo, manera Magaly Brito, Secretario General di SEPPA a duna di conoce Dialuna den un entrevista cu nos redaccion.
Como resultado di e reunion cu e mandatario, e servicio di transporte publico a keda reanuda, loke a trece un aire fresco di trankilidad cerca e usuarionan di Arubus, vooral esnan vast cu ta depende di e servicio di Arubus pa desplaza na nan trabao y bin cas bek, specialmente esnan cu ta traha den e area hotelero, supermercado y tiendanan, como tambe e servicio di bus escolar cu pa hopi alumno ta practicamente indispensabel.
Minister Arthur Dowers a elabora riba un avance crucial, esaki ta cu e demandanan di e trahadornan y e solucionnan financiero pa e compania, a wordo incorpora caba dentro di e Presupuesto pa aña 2027.
Pa alivia y resolve e crisis financiero hereda pa Arubus, y traha espacio pa un aumento salarial adecua, dilanti un costo di bida hopi halto, Gobierno ta bay implementa subsidionan adicional, y lo optimaliza mas entrada pa medio di reformanan adicional, manera e reintroduccion di e dollar cu e pasaheronan di crusero tabata paga tempo di gobierno di AVP, y cu despues a wordo elimina door di e gobierno cu a sigui (segun e mandatario a comenta na radio), pero e bez aki e fondonan aki lo bay directo pa Arubus.
