Cu gratitud na Benny pa revela con politico por bira miyonario
*Mike mester hura fieldad na e Arubiano despues di otro drama
*Problema formacion tabata 700 Florin manera DIARIO a adverti
ORANJESTAD(AAN)—Uno di e momentonan clave den e tratamento di e caso di Benny Sevinger den Corte di Husticia un par di luna pasa, tabata su revelacion cu mester a ilustra cu un politico no tin necesidad di horta.
Benny Sevinger a trata na mustra Corte di Husticia, con durante su temporada den servicio di Pueblo como representante di votadornan, el a gana bon placa.
Benny Sevinger, cu a logra sigui gana placa di Pueblo den Parlamento cu un sentencia pa prison den su man, a mustra Huez cu el a traha 16 aña como Miembro di Parlamento y 8 aña como Ministro y den e tempo aki a haya un entrada di casi Tres Miyon Florin.
Ademas di esaki, e tabata biaha como Ministro y Miembro di Parlamento, pero no tabata gasta tur e placa cu e tabata ricibi pa tur su “gastonan di biahe”.
Di e forma aki Benny Sevinger a revela, cuanto placa Pueblo di Aruba ta paga su gobernantenan pa nan percura pa un comunidad cu ta entrega nan pan pa nan come y sikiera un casita, cu naturalmente no por compara por ehempel cu un Penthouse, cu a haya basta popularidad na Aruba, despues cu Mike Eman a drenta su Penthouse.
Sin duda pa Mike Eman esaki ta entrega un facilidad ya cu for di momento cu Aruba a logra Status Aparte, durante periodonan basta largo, el a gana su pan den oficinanan di Gobierno di Aruba.
Un situacion serio a presenta na Aruba, caminda e partido Futuro a forma un gobierno cu AVP cu a priminti aumento di 700 Florin na momento cu e haya mando di Aruba, loke Futuro a nenga di presenta prome cu eleccion?
Futuro ta na haltura cu gobiernonan di Mike Eman a destrui Aruba financieramente, y esaki sigur ta bini dilanti ora nan a exigi pa Mike no haya carteranan di Finanzas y Economia.
Por conclui cu Futuro a permiti Aruba vota pa su futuro partner di gobernacion, Mike Eman, sabiendo cu lo tabata imposibel pa paga 700 Florin mas na Pensioen di Behez?
Benny Sevinger a entrega prueba cuanto placa politiconan ta gana a base di e belasting cu e Pueblo mester paga y sigur ta entrega e exigencia cu politiconan ta honesto cu Pueblo.
Sin estudio di loke e tabata papia, Mike Eman hamas mester a priminti e aumento di pensioen di behez, cu e tabata sa cu e no por honra.
E pregunta serio ta, con por ta posibel cu un persona cu atrobe a duna prueba cu e no sabi di kico e ta papia y a percura pa calamidad pa Aruba, por atrobe asumi responsabilidad di un Gobierno?
Con Mike Eman por ta Ministro Presidente si e no tabata capaz pa mira adelanta, cu sigur den e situacion mundial peligroso, no por bay aumenta pensioen di behez sin mas cu 700 Mil Florin pa luna!
DIARIO a duna prueba cu ta despues cu Mike Eman a haci e promesa, hunto cu Gerlien el a sinta na mesa cu director di SVB, cu no por a duna garantia cu tin placa pa un aumento di 700 Florin pa luna.
DIARIO a cuestiona e hecho aki, cu ta prueba di abuso di confiansa di Pueblo votador.
Na 2016, Arubianonan a hinca nan curpa den debe serio. A cumpra auto, a cumpra cas, A crea debe a base di e promesa cu Citgo lo yega Aruba.
Nunca Citgo a bini y den pandemia, cu Gobierno Wever-Croes mester a enfrenta, Arubianonan a wordo forza pa cumpli cu debenan cu Mike a haci.
Cuanto anciano awe, for di momento cu resultado di eleccion a bira conoci, no a haci debe pasobra nan lo ricibi aumento di pensioen?
Unda responsabilidad di gobernante a keda?
Democracia a papia un palabra cla. Democracia a bolbe spart den cara di votadornan cu e gran berdad di loke promesa di Mike Eman ta nifica realmente y ta haci cu un Pueblo.
Awe berdad ta papia pa su mes. ancianonan cu a kere atrobe den Mike Eman, futuro lider di Aruba cu ta celebra 75 aña di traicion di separacion cu no a bira libertad di Aruba pero a comberti Aruba directamente den ruman chikito di Curacao den Nederlandse Antillen!
Un drama social ta wordo ocasiona dor di politica barata, despues cu Aruba a cay den trampa atrobe di Mike Eman!
