‘Gana pa bo goza den Carnaval’
ORANJESTAD (AAN): Movimiento Electoral di Pueblo (MEP) ta anuncia su proximo rifa un biaha mas cu premio ‘cash’. Manera ya conoci, ta costumber pa Partido MEP organisa rifa durante aña no solamente pa ofrece oportunidad pa gana premionan pero principalmente cu e fin pa fortalece nos partido como tambe pa sigui cu nos vision y mision pa un Aruba mas fuerte y uni.
Cu cada ticket cu nos bende, ta un contribucion directo na nos mision pa fortalece progreso, sostenibilidad, y un inversion den bienestar di nos pais. Cu boso sosten, MEP por sigui cu nos programa y proyectonan entre otro e reunionnan den bario, Ban Topa, celebra dianan special cu nos pueblo, entre otro.
Premionan
E Rifa ‘Gana pa bo goza den Carnaval’ un biaha mas lo conta cu 5 feliz ganado den nos comunidad. E premionan e biaha aki atrobe ta ‘cash’, cu lo ta perfectamente ideal den un temporada di Carnaval como tambe un temporada na unda hopi famia ta haci uzo di hotelnan local of biaha. E premionan ta: 1. AWG. 10.000,-. 2. AWG. 1.500,-. 3. AWG. 1.000,-. AWG. 750,-. AWG. 500.
Di Dia di Sorteo
Sorteo di Rifa ‘Gana pa bo goza den Carnaval’ lo tuma luga dia 28 di februari, 2025 y ganadonan lo ser anuncia Live via nos plataforma di media social y corant local. No perde bo chens pa ta parti di e emocion y gana premionan cash!
“Movimiento Electoral di Pueblo (MEP) semper a kere den e forsa di comunidad di Aruba y den nos sostenedonan. Cu boso sosten, nos por haci diferencia—no solamente pa awe, pero pa generacionnan cu ta bini tambe. Un biaha mas nos ta pidi bo pa sigui den e lucha hunto cu nos y sea parti di e movecion pa logra hopi mas pa comunidad di Aruba.
Apesar cu pa hopi hende cosnan por ta dificil, nos ta aprecia enormemente esnan cu por contribui y sostene nos partido. E compromiso di MEP pa e pueblo di Aruba ta pa sigui traha incansablemente pa logra alcansa e maximo felicidad pa cada ciudadano riba e pida baranca aki. Y sosten di nos pueblo ta e motor den logra esaki. Danki pa e sosten. Danki pa semper tey pa MEP”, Lider di MEP Evelyn Wever-Croes a expresa.
