ORANJESTAD (AAN): Parlamentario Endy Croes ta splica cu e proximo gobierno tin retonan hopi grandi pa atende cune.
Banda cu nos mester enfoca masha hopi den e parti di recuperacion economia pa crea cuponan di trabou y poco poco pero sigur tur hende cu ainda ta riba FASE mester por reintegra na trabou, nos tin retonan por ehempel den educacion. A tuma nota di basta desaroyo cu mester atencion specifico pero cu e enfoke centralisa riba solucionnan structural.
/// Schoolnan di gobierno y Stichting na Aruba:
Na Aruba tin schoolnan di gobierno conoci como DPS esta Dienst Publieke Scholen y alaves nos tin 8 diferente Stichting cu ta cay bou di bijzonderonderwijs cu ta wordo subsidia pa gobierno. S.K.O.A.-S.O.A.Z.A.-S.P.C.O.A.-S.E.P.B.-S.M.O.A.-S.V.E.O.A.-S.V.G.A.y S.A.A. Pues 8 Stichting mas DPS di gobierno nos ta conta cu 9 schoolbesturen den totalidad. Pues Aruba ta conta cu 24 kleuteronderwijs, 36 basisonderwijs, 2 incorporatieonderwijs, 6 basis specialonderwijs, 1 voortgezetonderwijs, 10 MAVO, 1 EPB, 2 HAVO/VWO, 1 EPI y 2 HP ( IPA y UA).
Di acuerdo cu e informacionnan aki na Aruba tin 1650 maestro y maestranan di school y un total di 23.350 alumno.
Asina aki por tin un bista riba educacion den su totalidad na Aruba y hunto lo mester sa di busca solucion pa cada parti cu ta toca educacion momento esaki ta rekeri pa tal. Alavez lo keda pusha y inverti den nos maestro y maestranan pero sigur lo percura pa hisa e nivel di educacion na Aruba brindando tur mucha un oportunidad igual.
/// Problematica di werksternan di SKOA:
A tuma nota cu e promer dia di school SKOA no a habri su portanan pero mesun momento ta contento cu desde e segundo dia di school nos studiantenan por a acudi na school como cu SKOA a bay over na habri e schoolnan cu ta resorta bou di nan.
Berdad tin un discusion “ongoing” e aspecto di werksters. E discusion ta basa riba e total cu mester wordo paga y con ta paga nan esta si ta via subsidio di personal ( salaris) of via exploitatiekosten teniendo na cuenta entre otro interpretacion di e (3) leynan di enseñansa existente al respecto e tema aki esta LV Kleuter, LV Basis y LV voortgezetonderwijs. Sin importa e parti tecnico awor nos mester bin cu solucionnan concreto y structural.
Boluntad y profesionalismo lo mester prevalese pa pronto soluciona esaki unda tur partidonan por ta contento y trankil.
SKOA tin un total di 46 school reparti den 15 kleuterschool, 25 basis school , 1 school special y 5 school secundario.
Un total di 9500 alumno ta acudi na schoolnan di SKOA. Pues atencion lo bay tey pa hunto sali di un di e preocupacionnan esta e issue cu werksters banda di otro preocupacionnan cu nos lo busca e salida di mas elegante pa nan na bienestar general.
