Cargamento di 1.600 kilo di cocaina captura cerca di Islanan ABC

WILLEMSTAD: E barco Zr.Ms. Groningen y Wardacosta di Caribe Hulandes a intercepta un cargamento grandi di droga den Lama Caribe, den cercania di Islanan ABC.

   Tabata Diadomingo mainta trempan, cu e barco Zr.Ms. Groningen hunto cu Wardacosta a intercepta un transporte di droga, cu tabata basta pisa.

   Via di inteligencia a bin haya informacion di un boto moviendo den Lama Caribe.  E avion Dash-8 di Wardacosta a lanta vuelo y a bay localiza, y henter marduga a sigui core su tras.  Ta trata aki di un speedboat tipo Go-Fast.

   Ora cu Zr.Ms. Groningen a cuminza yega den e area, a baha dos boto di intercepcion rapido tipo FRISC, cu a nabega rapidamente den direccion di e Go-Fast.  Ora cu e Go-Fast a mira e botonan aki ta acercando, nan a cambia di rumbo pa trata di laga nan atras.  Aki e tripulantenan a cuminza benta bari di gasolin, y bultonan di droga den lama, pa asina haci nan boto mas rapido pa asina haya mas velocidad.

   Despues di un persecusion basta largo, finalmente e Go-Fast mes a daña y no por a sigui mas.  Asina e personanan abordo a wordo deteni.

   Na final a cuminza cu un accion di buskeda, y a logra di saca mas di 50 paki cu casi 1.600 kilo di cocaina for di lama.  E contrabanda a wordo confisca, y entrega na Cuerpo Policial di Curaçao, cu a laga destrui esaki mesora.