Caos total ora Aeropuerto St. Maarten a habri terminal nobo pa salida

PHILIPSBURG: E edificio nobo di Departure Hall na Aeropuerto di St. Maarten a habri pa publico Diaranson siman pasa.

  E compania operador a bisa cu e edificio nobo aki lo bay duna “un experiencia enrikeci pa tur pasahero”.  Pero e pasaheronan ta contando otro storia:  “Un caos total, hopi turista furioso,” ta loke un señora a describi e situacion na Aeropuerto.

   Nan ta bisa pasaheronan pa yega Aeropuerto como 3 ora prome cu nan vuelo, y esaki a pone hopi pasahero bin para den rij.  E corant The Daily Herald tabatin un empleado tambe para den rij, y el a dura 2 ora prome cu nan a logra pasa Airport Security pa finalmente yega na porta di salida.  Anto el a keda hopi ora den rij, siendo cu el a paga pa VIP Service.

    Nan a mira cu empleadonan di Aeropuerto aparentemente no tabata completamente prepara pa e situacion nobo, y esaki a ocasiona hopi frustracion y rabia cerca e pasaheronan.

   Pasaheronan cu ta viaha cu American Airlines of Delta Airlines, mester keda warda riba Bus pa hiba nan pa subi avion.

   Arrival Hall tambe: Pa vuelonan cu a caba di aterisa, e pasaheronan a confronta un situacion aun mas fuerte compara cu esnan paden di edificio.  Como cu e Sala di Yegada temporal ta demasiado chikito pa acomoda tur pasahero, un cantidad grandi di pasahero mester a keda para 1½ ora cerca di e plataforma pafo, den tur e solo ey prome cu por a drenta cerca Inmigracion, haya maleta, y pasa door di Aduana.

   Y prome cu bo yega na e funcionario di Inmigracion, no tin ningun toilet disponible.  Pues pasaheronan cu ta baha di avion keriendo cu nan lo haya un toilet rapido, tin di keda tin biaha asina hopi largo ta warda.

   Pues no ta djis pa pasaheronan cu ta saliendo, pero pa esnan cu ta yega tambe.

   Perde nan vuelo di conexion: Riba Diabierna e situacion tabata pio, y debi na esey hopi turista cu tabata viahando bek cu American Airlines a perde nan vuelo di coneccion na Charlotte.  Pasobra tabatin solamente 2 hende pa check-in pasahero, y Inmigracion tabatin solamente 2 funcionario pa check kizas 1.000 pico pasahero.  Pa colmo e Scanner tambe a daño, y tur hende mester a keda 45 minuut para sin por sigui cu e proceso.

   Pa colmo, e sistema di intercom no ta funcionando ainda den e edificio nobo, pues ningun pasahero sa kico pa haci.  E tabata caos absoluto y confusion.  Y masha hopi pasahero mes den fin di siman ta comentando riba Social Media cu nan lo no regresa mas St. Maarten debi na esaki.

   Reaccion lento gerencia: Loke a haci hendenan mas furioso, ta cu e compania cu ta opera e Aeropuerto a keda pone riba Social Media storianan bunita so di e reapertura di e Area di Salida, papiando di e progreso, y di tur cos bunita.  Publico tabata reacciona fuerte riba nan, y nan no a haci nada pa acepta esaki.

   Nan a warda te Diasabra mainta trempan pa porfin emiti un aviso, pa pidi pasaheronan pa bin aun mas prome pasobra nan ta confronta “problema cu ekiponan”.  Pero nan no a splica kico nifica “mas trempan”, pasobra durante henter siman tabatin pasahero cu a yega 3 ora adelanta, y asina mes nan a sali hopi laat mes y yega Merca perde nan connecting-flights.

   E Sala di Check-In lo bay ta cla pa habri na December 2023.  E Sala di Yegada lo bay keda cla den di dos cuartal di 2024.