Apenas 2 luna pasa fabricantenan a emiti recall pa caso similar
ORANJESTAD (AAN): Alarma a ser bati Diasabra net despues di mey anochi, na tanto Polis como tambe Centro di Alarma, cu habitantenan na un cas na Caya Strea, situa na Tarabana, a spierta cu sonido fuerte di explosion pafo dilanti nan cas.
Ora cu a bay check pafo, a bin mira cu un auto hatchback Hyundai Accent ta na candela, y pesey a bati alarma.
Polis di Playa a ser manda mesora na e adres aki, y na yegada a topa cu candela cu vlamnan grandi ta sali di e cas. Bomberonan tambe a yega rapido, y mesora a cuminsa na combati esaki na e forma mas eficiente.
Polis a papia cu e habitante, y el a splica cu e doño di e auto mes no tey, pero nan a caba di manda notifik’e cu su auto ta kimando. El a core busca forma pa yega cas e ora ey.
Ora e doño a yega, e bista di su auto destrui sigur a produci un reaccion basta sentimental y doloroso pe.
Bomberonan ta pensa cu e candela aki a start intencionalmente, sinembargo menos di dos luna pasa, esta dia 27 di September 2023, e compania Hyundai a adverti consumidornan rond mundo cu tin chens cu bo Hyundai Accent modelonan di aña 2012 te cu 2015 por cende candela inespera, sea e auto ta den careda of e ta djis staciona sin hende aden.
E advertencia di Hyundai y tambe National Highway Traffic Safety Administration a bin despues di un serie frequente di Hyundai Accent na candela, como tambe demas modelonan di Hyundai manera Hyundai Elantra, y Hyundai Genesis coupe. Pero e ta afectando modelonan KIA Sorento, y tambe Kia Soul.
Pesey Hyundai y tambe KIA a pidi doñonan di Hyundai Accent, pa evita di staciona paden di garashi of otro structura, debi cu e auto inespera y diripiente por pega candela.
Esaki ta debi cu e auto por desaroya un lek di liquido interno den e modulo di anti-lock brake. Esaki por resulta den un corto circuito cu ta pone keinta demasiado, y finalmente start un candela.
Hyundai y KIA na Merca a emiti un recall pa como 3.3 miyon di e vehiculonan aki na e pais.
