Cantidad di peticion pa sosten financiero pa famia a baha compara cu aña pasa

Cantidad di peticion pa sosten financiero pa famia a baha compara cu aña pasa

Segun Marceylaine Paskel di DAS:

ORANJESTAD (AAN): Peticionnan pa sosten financiero/bijstand e aña aki a baha compara cu aña pasa. Pa aña 2025 tabatin un cantidad di 485 peticion mientras te cu awo, pa aña 2026 tin un total alrededor di 415. Segun Marceylaine Paskel di Directie Sociale Zaken (DAS), ta premira cu e cantidad di peticion lo sigui baha. 

Como parti di su esfuerzonan pa sostene nan clientenan pa drenta bek den mercado laboral, DAS ta ehecuta e programa ‘In the Picture’ den colaboracion cu Stichting Ja Ik. Esaki ta e di tres edicion y, segun Paskel, ta duna bon resultado. Algun cliente ya a logra drenta mercado laboral. E cifranan concreto tocante e resultadonan lo wordo anuncia proximamente. 

Paskel a splica cu e sosten financiero ta consisti di dos categoria: bijstand pa famia y gehandicaptenuitkering, esta sosten financiero pa personanan cu un limitacion. Riba e lista di pago di october tabatin 423 caso di bijstand pa famia y 1.336 di gehandicaptenuitkering. Segun e, e cantidad di casonan di bijstand pa famia ta sigui baha cada luna. 

El a enfatisa cu bijstand pa famia ta un sosten temporal, destina pa yuda clientenan durante e periodo cu nan ta prepara pa drenta bek den mercado laboral. E meta di DAS ta pa guia cada cliente den su desaroyo y yuda nan avansa na mas independencia financiero. 

Den e proceso aki, participacion den ‘In the Picture’ ta obligatorio pa e clientenan. Paskel a indica cu clientenan cu nenga di participa por tin consecuencia pa nan sosten financiero. Sinembargo, segun e, tur cliente ta participa. Aunke algun ta cuminsa cu cierto resistencia pa motibo cu nan ta sinti nan forsa, durante e programa nan ta cuminsa aprecia y disfruta di e trayecto cu ta dura cinco luna. 

‘In the Picture’ ta combina entre otro apoyo psicologico cu guia social di DAS. Participantenan ta siña con pa administra nan presupuesto, atende cu situacionnan den bida familiar y maneha stress y emocionnan. E conocementonan aki ta contribui na nan preparacion pa mercado laboral. 

Paskel tambe a destaca e contribucion di Jalken Antonia di Stichting Ja Ik, cu ta traha riba desaroyo personal y e manera cu participantenan ta pensa tocante nan mes y nan posibilidadnan. E programa ta inclui temanan manera etica laboral y preparacion pa entrevista di trabou. Ademas, participantenan ta bishita diferente compania y ta haci stage pa adkiri experiencia practico. 

Pa e trayecto aki sigui duna resultado, colaboracion di sector comercial ta esencial, Paskel a enfatisa. DAS ta gradici e companianan cu ta brinda su clientenan oportunidad pa adkiri experiencia y drenta mercado laboral. 

Companianan interesa pa colabora cu ‘In the Picture’, ofrece un luga di stage of brinda oportunidad di empleo por tuma contacto cu DAS via This email address is being protected from spambots. You need JavaScript enabled to view it..