Shurman Milliard di Telefon pa Hubentud:
- Den 26 aña di existencia
ORANJESTAD (AAN): Desde su lansamento dia 20 di november 1999, Telefon pa Hubentud Aruba, conoci como 131, ta ofrece muchanan y hobennan di 8 pa 24 aña un espacio pa papia, ser scucha y ricibi apoyo emocional. Durante 26 aña, e organizacion a brinda orientacion confidencial via telefon, chat y email, promoviendo derechonan di mucha y yudando hubentud enfrenta desafionan cu mas confianza y speranza.
Den un entrevista cu DIARIO, Shurman Milliard di 131 Aruba a duna di conoce cu e organizacion ta den un proceso di renovacion pa adapta su trabao na e necesidadnan actual di muchanan y hobennan. E proceso aki ta basa riba un analisis di desaroyonan tanto na Aruba como internacionalmente.
Milliard a menciona, entre otro, e uzo di internet y e desafionan relaciona cu salud mental y bienestar emocional. Segun e, ta importante pa sigui e desaroyonan internacional, ya cu algun di e situacionnan cu ta presenta na Aruba por a wordo experiencia caba den otro pais. E conocemento y experiencianan ey por yuda atende e desafionan na Aruba di un manera mas efectivo.
El a enfatisa cu prevencion ta un parti central di e trabao di Telefon pa Hubentud. P’esey, e fundacion ta duna hopi importancia na derechonan di mucha den su charlanan, proyectonan y e orientacion cu e ta ofrece via su linea 131, cu ta habri tur dia di 2:00 pa 6:00 di atardi.
Segun Milliard, Telefon pa Hubentud tabata prome na Aruba den e desaroyo di proyectonan y programanan pa conscientisa tocante termento. Cu tempo, mas organizacion a incorpora e tema den nan trabao, ampliando e atencion pa e problema. Den su evaluacion, e esfuersonan aki a contribui na reduccion di termento.
El a indica cu un desaroyo similar ta visibel den e atencion pa derechonan di mucha. Actualmente, diferente fundacion y comision di Gobierno ta inclui e tema den nan prioridadnan, mientras UNICEF tambe ta contribui na e trabao di conscientisacion.
Pa 131 Aruba, e compromiso cu derechonan di mucha ta sigui forma un parti esencial di su mision. Milliard a expresa cu e organizacion ta sinti orguyo di e confianza y reconocemento cu e a construi den comunidad, particularmente rond Dia di Mucha, 20 di november.
“Si bo ta haci bo trabao cu hopi pasion y dedicacion, mescos cu 131 ta haci pa hopi aña caba, nos ta wordo mira como esun cu ta papia mas tocante derecho di mucha. Esaki ta hopi importante pa nos y nos ta bisti e bachi cu honor”, Milliard a expresa.
El a agrega cu e organizacion ta hopi contento cu comunidad ta asocia 131 cu Dia di Mucha, un reconocemento cu ta refleha su compromiso continuo cu bienestar y derechonan di muchanan y hobennan na Aruba.