Actividad sano pa hobennan mester reemplaza desaroyo peligroso
*Suicidio y horor creciente bou hobennan relata na uzo medionan social
*Edad minimo pa TikTok y Instagram mester wordo considera 15 aña
ORANJESTAD (AAN) — Na varios occasion DIARIO a relata e peligro enorme cu e obheto di moda, smartphone, hunto cu medionan social ta representa pa muchanan.
Na Hulanda despues di accion ferviente di gruponan den comunidad, porfin Gobierno Hulandes a dicidi pa accion contra e peligro mortal pa hobennan.
E pasonan di Gobierno Schoof contra destruccion di mucha y hobennan dor di uzo di Smartphone y medionan di comunicacion social, no ta parti di un ley oficial, pero parti di guia (richtlijn) cu Gobierno Hulandes ta duna, aunke den exterior ya varios pais a introduci leynan directo pa bay contra e naturaleza destructor pa hobennan cu ta sconde en comunicacion pa medio di Smartphones pero tambe uzo di medionan social.
E presentacion di Gobierno Hulandes riba e tereno aki ta resultado di accion internacional riba e efectonan directo cu uzo di medionan social alcansabel via telefon, television y computer (medionan social) tin ariba mucha.
Muchanan tin problema pa drumi den e macuto di malezanan mental di cual nan ta bira obheto.
Mucha ta bira esclavo di nan telefon y medionan social, loke ta conduci na problemanan pa drumi, atake di panico, depresion, problema pa concentra.
Uno di e resultadonan mas peligroso sin duda ta e imagen propio cu ta wordo crea cerca muchanan, cu ta ricibi ehempelnan falso di loke ta bunita y atractivo por ehempel y ta considera cu nan no por competi contra imagennan perfecto falso cu ta wordo presenta na nan.
Cerca un grupo e final ta bira hasta suicidio, manera anteriormente DIARIO a adverti den otro articulonan acerca e tema aki.
Manera a bini dilanti den tratamento di e topico na Hulanda, ta wordo asumi cu uno den cada 13 mucha, tin problema cu nan mes y nan propio imagen y mundo directo.
E conseho di Gobierno Hulandes ta basa su mes riba un edad minimo di 15 aña pa medionan social manera Tiktok y Instagram.
Segun e guia basico tin dos tipo di app, cu ta chatapps manera Whats-App y Signal, cu solamente mucha cu ya ta bishita schpool secundario, por maneha.
Ora e mucha ya ta capaz pa comunica pa medio di APP, por permiti otro medionan di comunicacion.
Ora nan ta capaz pa APP, por sigui cu participacion na otro medionan social.
Pues edad minimo pa atende cu Instagram y TikTok mester bira pues 15 aña.
Mucha cu no a alcansa edad di dos aña no mester uza medionan riba pantaya mientras mucha for di 12 aña, no mester pasa mas cu tres hora pa dia dilanti un pantaya.
Mucha cu no a alcansa e edad di 11 pa 13 aña no mester uza smartphone.
Ta e intencion pa Hulanda atende cu Union Europeo tambe riba e problema serio y pidi intensificacion di cooperacion pa bini cu lesgislacion adapta na e peligro cu servicionan digital por tin como resultado.
No ta conoci cu den seno di Reino accion ta wordo tuma dor di Hulanda riba un tema cu ta produci problemanan serio pa comunidad y ta rekeri esfuerzo importante di gobernacion.
DIARIO lo sigui informa Aruba riba e asunto cu ta directamente relata na e bienestar di hobennan cu ta futuro di e pais pero tambe manera expertonan ta indica, tin influencia riba problemanan social importante den bida di adulto cu DIARIO den su proximo edicionnan lo abarca, teniendo cuenta cu problemanan serio den familia y di comportacion cu e peligronan moderno ta encera y directamente a kibra bareranan pa contenido di intercambio di asuntonan personal y priva, cu ta habri porta pa peliger serio pa adultonan tambe!
DIARIO ta den contacto cu expertonan ariba e problemanan cu ta conduci na comportacion di asulto y hoben cu mas y mas tin problema cu comunicacion.
Expertonan riba e tereno ta mustra cu contacto social entre hende awor pa un parti demasiado grandi ta tuma lugar via medio social, cu ta kita hende tambe for di otro tipo di actividad.
Manera a wordo presenta na DIARIO, mucha tambe mester wordo educa cu atencion pa su mundo, pa su comunidad y aceptacion pa su mes y su realidad pa asina e por conoce stabilidad y no basa su pasonan riba un futuro artificial.
