Cantidad di desperdicio colecta ta señala claramente cu comunidad tin un deseo real pa mantene Aruba limpi

Prome Minister Mike Eman:

ORANJESTAD (AAN): Prome Minister Mike Eman hunto cu Ministerio di Turismo, Transporte y Labor bou guia di Minister Wendrick Cicilia, a expresa nan satisfaccion cu e resultado positivo cu iniciativa “Zona di Desperdicio” a logra durante e prome simannan di operacion riba e tereno di Ecotech Freezone na Parkietenbos.

Durante un update riba e proyecto, Prome Minister Mike Eman a indica cu despues di casi dos siman di introduci e facilidad pa comunidad por trece sushi gratuitamente, e respuesta di pueblo a supera expectativanan. “Nos ta hopi contento cu e participacion cu nos ta mira. Den aproximadamente dos siman, casi 1.000 vehiculo a yega pa trece desperdicio y nos ta calcula cu pa final di siman lo supera 2.000 pickup/ vehiculo cu a uza e facilidad,” asina Eman a declara.

Segun Prome Minister Eman, e cantidad di desperdicio colecta ta señala claramente cu comunidad tin un deseo real pa mantene Aruba limpi y cu tin necesidad pa e facilidadnan accesibel pa deshaci di sushi di un manera responsabel. E cifranan actual ta indica cu mas cu 165.000 kilo di desperdicio a wordo colecta den e prome simannan, mientras cu Gobierno ta spera cu e cantidad lo sigui aumenta significativamente den e dianan y simannan cu ta bin.

E iniciativa ‘Zona di Desperdicio’ ta sigui riba e impulso crea door di e diferente edicion di “Baki den Bario” cu Gobierno a organisa durante e ultimo añanan den diferente bario riba nos isla. Durante e actividadnan ey, comunidad tabata haya oportunidad pa deshaci di desperdicio di cas y comercial den un manera practico y accesibel.

Segun Gobierno, e exito di Baki den Bario ta muestra cu comunidad ta dispuesto pa colabora activamente den mantene Aruba limpi ora cu tin facilidadnan y apoyo adecuado disponibel. “Nos a mira durante Baki den Bario con pueblo a responde cu entusiasmo y compromiso. Zona di Desperdicio ta sigui construi riba e mesun idea: gobierno y comunidad trahando hunto pa logra un Aruba mas limpi y mas bunita,” Eman a expresa.

Prome Minister Eman a enfatisa cu iniciativa aki ta forma parti di un vision mas amplio pa mehora limpiesa den bario, rond di casnan, negoshinan y scolnan. “Awor comunidad tin un luga caminda nan por trece sushi gratuitamente. Esaki ta importante pa mantene nos bario y entorno mas limpi y mas cuida,” Eman a expresa.

E Prome Minister a haci tambe un yamada na comunidad pa sigui haci uso di e facilidad y pa participa activamente den mantene Aruba limpi. Gobierno a expresa gradicimento special na Ministerio di Turismo y Minister Wendrick Cicilia pa e apoyo y cooperacion den financia e proyecto.

Zona di Desperdicio, localisa na Parkietenbos 53-A, ta habri di dialuna te cu diadomingo entre 7:00 di mainta y 3:00 di atardi, brindando comunidad un opcion accesibel y practico pa dishaci di desperdicio.