ORANJESTAD (AAN): Biblioteca Nacional Aruba (BNA) ta mira bek cu satisfaccion riba un siman yen di intercambio profesional y
inspiracion durante su participacion na e di 55 conferencia anual di ACURIL (Association of Caribbean University, Research and Institutional Libraries), cu a tuma luga na San Juan, Puerto Rico.
Un delegacion di Biblioteca Nacional Aruba a forma parti di e conferencia, hunto cu centenares di profesionalnan di biblioteca, archivo y museo for di diferente pais y teritorio di Caribe. Durante e siman di 7-11 di juni, e participantenan di BNA a bira parti di diferente presentacion, panel, tayer y sesion di discusion riba temanan actual manera inteligencia artificial, preservacion digital, acceso na informacion, sostenibilidad y futuro di bibliotecanan y archivonan den un mundo cada biaha mas digital.
ACURIL 2026 a brinda un plataforma valioso pa comparti experiencia, conoce bon practicanan internacional y fortalece e red di colaboracion cu coleganan profesional den Caribe. E participacion di BNA a reafirma e importancia di sigui innova y inverti den servicio, coleccionnan y proyecto cu ta contribui na preservacion y acceso na e patrimonio documental y cultural di Aruba.
Un momento particularmente special durante ACURIL 2026 tabata e reconocemento cu Biblioteca Nacional Aruba a ricibi di ACURIL Puerto Rico Chapter mediante e Albertina Pérez de Rosa Award for Alliances and Collaborative Projects Among Information Units in the Caribbean. E premio a wordo entrega como reconocemento di e alianza ehemplar y colaboracion exitoso cu a resulta den e proyecto comunitario Hofi Joy.
Segun hurado, e iniciativa a destaca pa su contribucion na educacion sostenibel, participacion comunitario y acceso na siñamento, integrando naturaleza, arte y cultura di Aruba. E reconocemento aki ta confirma e balor di colaboracion entre diferente partner y e impacto positivo cu proyectonan comunitario por tin riba desaroyo cultural y educativo di nos comunidad.
Biblioteca Nacional Aruba ta ricibi e honor aki cu hopi orguyo y ta dedica e logro na tur colega, partner, voluntarionan y miembro di comunidad cu a contribui na exito di Hofi Joy como un espacio di encuentro y apreciacion di nos patrimonio natural y cultural.
Biblioteca Nacional Aruba ta gradici e organizadornan di ACURIL Puerto Rico pa un conferencia inspira y bon organiza. E conocemento y relacionnan profesional cu a wordo fortaleci durante e siman lo contribui na e continuo desaroyo di BNA como centro di conocemento, investigacion y patrimonio cultural.
BNA ta keda comprometi na sigui fomenta cooperacion regional, innovacion y acceso na informacion, mientras cu ta proteha y comparti e herencia cultural di Aruba pa generacionnan presente y futuro.
