Candidata di estatura riba di 1.8 meter a gana Miss Universe Puerto Rico

SAN JUAN: E candidata Michelle Coló di 21 aña di edad cu ta bin di municipio Loíza, a wordo corona siman pasa como Miss Universe Puerto Rico 2021,

y awor e tin di bay defende e isla Caribense den e certamen di Miss Universe 2021 cu lo tin su di 70 edicion na December di e aña aki na Israel.

   Michelle ta un brunette impactante cu a convence e hurado pa asina e wordo corona como e muher mas bunita di Puerto Rico, den un evento cu a pasa na TV pa henter e isla for di Centro de Bellas Artes di Santurce, na San Juan.

   E ta bin di municipio Loíza cu ta keda na e costa panort di e isla, unda tin hopi poblacion di origen africano.  El a haya tambe e premio di ‘Mujer de Valor’, cu ta wordo duna pa L’Oréal Paris pa premia esnan cu ta duna bon prestacion filantropico.

   E ganadora nobo di Miss Universe Puerto Rico a sobresali contra e demas candidatanan, pasobra e tin un estatura di 1.83 meter, cu sin duda a influencia e hurado ora di dicidi un ganadora.

   Esaki no ta prome biaha cu Michelle Colón ta triunfa den un certamen di beyeza, pasobra na 2018 el a yega di gana e certamen di Miss Teen Americas.

   E hoben actualmente ta studiando biologia, pues temporalmente e lo stop di sigui Universidad pa cumpli cu e obligacionnan di Miss Universe Puerto Rico pa e aña su dilanti.

   E ganadora tin su mesun fundacion cu yama ‘Care Empowerment Program’.

   E anochi di e certamen pa escoge e muher mas bunita di Puerto Rico, a inclui prestacion musical di artistanan Colombiano Manuel Medrano y Fonseca.

   Prome Finalista a bira Jaylene Alvarez (Miss San Lorenzo), y Segundo Finalista a bira Oxana Rivera (Miss Dorado).